قاراعاندىداعى كوستەنكو شاحتاسىندا 4 كونۆەيەر شترەگى تۇتىندەپ، 187 كەنشى شاحتادان جەر بەتىنە شىعارىلدى، دەپ حابارلايدى «ادىرنا» ءتىلشىسى توتەنشە جاعدايلار مينيسترلىگىنە سىلتەمە جاساپ.
«جاساندى دەنە تومەنگى توسەمنىڭ روليگىنە ءتۇسىپ، ونىڭ جۇمىسىن بۇعاتتاعان. بۇل كونۆەيەر تاسپاسىندا ءتۇتىننىڭ شىعۋىنا سەبەپ بولدى»،—دەپ جازدى مينيسترلىكتىڭ ءباسپاسوز قىزمەتى.
تجم كونۆەيەرلىك تراسسالار ۋچاسكەسىنىڭ ەلەكتر سلەسارى ايبار قوسانوۆتىڭ العاشقى ءورت ءسوندىرۋ قۇرالدارىن پايدالانا وتىرىپ، ءتۇتىندى جويعانىن ايتتى.
كەنشى وقيعا تۋرالى حابارلاپ جاتقاندا شاحتانىڭ باسقارۋ بولمەسىندە ءتۇتىن سيگناليزاتسياسى ىسكە قوسىلعان.
«ساعات 19:45–تە سيگناليزاتسياعا بايلانىستى ءتۇتىن سوندىرىلگەنىنە قاراماستان ەۆاكۋاتسيا جوسپارى بويىنشا شاحتاداعى 194 كەنشىنى سىرتقا شىعارۋ جونىندە شەشىم قابىلدانعان.
ساعات 21:47-دەگى جاعداي بويىنشا 187 كەنشى جەر بەتىنە شىعارىلدى، ۋچاسكە باسشىلارى مەن باقىلاۋشىلار قاتارىنان 7 قىزمەتكەر وقيعانى باقىلاۋ جانە شاحتانىڭ تىرشىلىگىن قامتاماسىز ەتۋ ءۇشىن سول جەردە قالدى. كەنشىلەر اراسىندا زارداپ شەككەندەر جوق»،—دەلىنگەن حابارلامادا.
ەسكە سالا كەتەيىك، وتكەن جىلدىڭ 28 قازانىندا قاراعاندىداعى كوستەنكو اتىنداعى شاحتادا اپات بولىپ، 46 كەنشى قازا تاپقان ەدى. اپات كەزىندە شاحتادا 252 ادام بولعان. ونىڭ 205-ءى جەر بەتىنە شىعارىلدى.
