1 مامىر – قازاقستان حالقىنىڭ بىرلىگى كۇنى قوستاناي قالاسىندا قايىرىمدىلىق اكتسياسىنان باستاۋ الدى. وبلىس اۋماعىن مەكەن ەتكەن ءتۇرلى ەتنوس وكىلدەرى اتالمىش اكتسياعا بەلسەنە ات سالىستى.
– تاۋەلسىز قازاقستاننىڭ ەڭ باستىسى قۇندىلىعى – ول بىرلىك. ءبىزدىڭ بىرلىگىمىز قيىندىقتاردى بىرگە جەڭە الاتىنىمىزدى، بەيبىتشىلىك پەن كەلىسىمدە ءومىر سۇرە الاتىنىمىزدى دالەلدەيدى، - دەيدى «قوعامدىق كەلىسىم» مەكەمەسىنىڭ باسشىسى ناتاليا رامازانوۆا. – بۇگىن ەتنومادەني بىرلەستىك وكىلدەرى «جيزن نا لادوني» جوباسىنىڭ قاتىسۋشىسى ساۆەلي گريگورەۆكە قولداۋ كورسەتۋ ءۇشىن قايىرىمدىلىق جارمەڭكەسىن وتكىزىپ جاتىر. بارشاڭىزدى قوستاناي وبلىسى قازاقستان حالقى اسسامبلەياسى اتىنان بىرلىك كۇنىمەن قۇتتىقتاي وتىرا، وسى يگى ءىس-شارادان قالىس قالماۋعا شاقىرامىن.
مەرەكەلىك ءىس-شارا ءتۇرلى ۇلت وكىلدەرىنىڭ اسەم ءان-كۇيى مەن اسەرلى ءبيى ءتارىزدى ءدۇبىرلى دۋمانمەن باستالىپ، جارمەڭكەمەن جالعاسىن تاپتى. ەتنومادەني بىرلەستىكتەردىڭ قازاقتىڭ دارحان دالاسىنداي ەتىپ جايعان داستارحانىنا قىزىققان حالىقتىڭ قاراسى قالىڭ. ۇلتتىق تاعامدار جارمەڭكەسىنەن جينالعان قاراجات تسەرەبرالدى سال اۋرۋىنا شالدىققان ساۆەلي گريگورەۆتىڭ ەمىنە جۇمسالاتىن بولادى.
جارمەڭكەدەن بولەك، مەرەكە قوناقتارىنىڭ نازارىن اۋدارعان باعدارلاما ۇلتتىق ستيلدەگى شوپەرلەر تىگۋ شەبەرحاناسى بولدى. بەلسەندى قوزعالىستى قالايتىندار ءۇشىن حالىق بيلەرى بويىنشا شەبەرلىك سىنىبى ۇيىمداستىرىلىپ، ۇلتتىق ويىندار جارىسىنا قاتىسۋ ۇسىنىلدى. ال كىشكەنتاي كورەرمەندەردىڭ كوڭىلىن ءتۇرلى ءتۇستى اكۆاكريممەن اۋلادى. سونداي-اق، كەشتىڭ كوركىن قالانىڭ ۇزدىك شىعارماشىلىق ۇجىمدارى مەن جايدارمان ويىندارى كىرگىزدى.
ءبىر كىسىدەي جۇمىلا قاتىسقان ءىس-شارانىڭ ارقاسىندا 11 جاسار ساۆەليدىڭ ەمىنە جارتى ميلليونداي قاراجات جينالدى. بالانىڭ اتا-اناسى ۇيىمداستىرۋشىلار مەن بارلىق قامقور ادامدارعا زور العىسىن ءبىلدىردى.
