الماتى وبلىسىندا تۇرعىندار وزدەرى جول جوندەۋگە ءماجبۇر

الماتى وبلىسىنداعى تۇتاس ءبىر اۋىلدىڭ تۇرعىندارى اقشا جيناپ، اۋىلعا اپاراتىن جالعىز جولدى وزدەرى جوندەپ جاتىر، دەپ حابارلايدى «ادىرنا» ۇلتتىق پورتالى InformBuro سايتىنا سىلتەمە جاساپ.

اۋىل تۇرعىندارىنىڭ ايتۋىنشا، ولار جولدى تىم بولماسا تەگىستەۋدى سۇراپ، اكىمدىككە بىرنەشە رەت حات جازعان. الايدا شەنەۋنىكتەر جاقىن ماڭداعى 100 ءۇي اۋىلدىق وكرۋگكە قارامايدى دەپ وتىر. جەرگىلىكتى بيلىكتەن ءۇمىتىن ۇزگەن اۋىل تۇرعىندارى وبلىس باسشىلىعىنان كومەك كۇتۋدە. ءبىر قاراعاندا كوشەگە قۇم توسەپ، ونى تەگىستەپ، جولدى جوندەپ جاتقان توپ جالدامالى جۇمىسشىداي كورىنۋى مۇمكىن. نەگىزى بۇلار اقكەنت اۋىلىنىڭ تۇرعىندارى. ايتۋلارىنشا، بۇل اۋىلعا اپاراتىن جالعىز جول بولعاندىقتان، باسقا امالدارى بولماعان. جىل سايىن كوكتەم مەن كۇزدە وسىلاي جولدى وزدەرى جوندەيدى. «ولار ءبىر جيىن نەمەسە باسقا بىردەڭە وتكىزسە، بەلبۇلاق اۋىلدىق وكرۋگىنىڭ قاراماعىنا كىرمەيدى دەيدى، ول قالاي كىرمەيدى، تالعار حقكو بارساڭ: «سەن بەلبۇلاق اۋىلىندا تىركەلگەنسىڭ»، دەيدى. ءبىز مۇندا كەلەمىز، جوقپىز. سوندا ءبىز امەريكادان كەلدىك پە؟ جىل سايىن كوكتەم مەن كۇزدە بۇل جولدى ءوزىمىز بىرتىندەپ جوندەيمىز»، – دەپ اشۋلاندى بەلبۇلاق اۋىلىنىڭ تۇرعىنى قۇدايبەرگەن اۋباكىروۆ. حالىقتىڭ ءوزى ايتقانداي، اكىمدىك وكىلدەرى بۇل ماسەلەدەن حاباردار. الايدا ولار ءارتۇرلى سەبەپتەرمەن كومەك كورسەتۋدەن قاشادى. «اۋىل تۇرعىندارى 10-20 مىڭنان جينايدى. مىسالى، مەن 30 مىڭ بەردىم. بۇل اقشاعا كولىك جالداپ، بۇكىل اۋىل جول جوندەۋمەن اينالىسادى»، - دەيدى بەلبۇلاق اۋىلىنىڭ تۇرعىنى قانات دۇيسەنبەكوۆ. ال اكىمدىكتەگىلەر ساراپتاماعا قۇجاتتاردى دايىنداپ جاتقانىن حابارلادى. «جول كەلەسى جىلى اياقتالادى دەپ ناقتى ايتا المايمىن. 50/50. الدىمەن ساراپتاماعا جىبەرەمىز. ساراپتاما دايىن بولعان سوڭ، جول جوندەۋگە بيۋدجەتتىك ءوتىنىم بەرەمىز. ەگەر بيۋدجەتتىك ءوتىنىم ماقۇلداندى، قاراجات بولىنەدى دەسە، جوسپار كەلەسى جىلدىڭ ەكىنشى جارتىجىلدىعىنا قوسىلادى. ال ەگەر ولار كەلەسى جىلدىڭ ەكىنشى جارتىجىلدىعىنىڭ جوپارىنا ەنگىزبەسە، وندا بۇل ءىس 2025 جىلدىڭ ءبىرىنشى جارتىجىلدىعىنا قالادى»، - دەپ ءتۇسىندىردى بەلبۇلاق اۋىلدىق وكرۋگىنىڭ اكىمىنىڭ ورىنباسارى ابزال ساباليەۆ.

«ادىرنا» ۇلتتىق پورتالى