امەريكانىڭ چيكاگو قالاسىندا قازاقتىڭ ۇلتتىق تاعامدارىن ۇسىناتىن «Tary» ءدامحاناسى ءوز جۇمىسىن باستادى. «ادىرنا» ءتىلشىسى ونى اشۋشىلاردىڭ ءبىرى سىمبات جارقىنقىزىمەن تىلدەسىپ، از-كەم اڭگىمە قۇردى.
«بيزنەس اشۋ قيىن ەمەس»
- اقش-قا جوعارى وقۋ ورنىنان كەيىنگى ءبىلىمىمدى جالعاستىرۋ ءۇشىن كەلگەن بولاتىنمىن. ماگيستراتۋرادا digital marketing ماماندىعىن وقىدىم. قازىرگى تاڭدا چيكاگودا تۇرىپ جاتقانىما 3 جىلدىڭ ءجۇزى بولدى. وسى قالادا ۇلتتىق ناقىشتاعى قازاق ءدامحاناسىن اشۋ يدەياسى 1 جىل بۇرىن كەلدى. قازاقستانعا بارعانىمدا نۋتريتسولوگىم بارۋ كەرەك تاماقتانۋ ورىندارىنىڭ ءتىزىمىن بەرگەن ەدى. ولاردىڭ اراسىندا «Tary» ەتنو-كوفەحاناسى دا بولدى. سول كەزدەن باستاپ جاڭا كاسىپ تۋرالى ويلانا باستادىم. كەيىننەن «Tary»-نىڭ فرانشيزاسىن ساتىپ الۋعا بولاتىنىن ەستىپ، بىردەن ىسكە كىرەستىك. شىنى كەرەك، بۇل سالادا بۇرىن جۇمىس ىستەمەدىم. الايدا ينۆەستيتسيا بولسا، بيزنەس اشۋ قيىن ەمەس ەكەنىنە كوزىم جەتتى، - دەپ اڭگىمەسىن باستادى كەيىپكەرىمىز.
سىمبات جارقىنقىزىنىڭ ايتۋىنشا، اقش-تا باسەكە جوعارى.
- ارينە، قازاقستانمەن سالىستىرعاندا بۇل جاقتا باسەكە الدەقايدا جوعارى. دەسە دە، ءبىزدىڭ جوبامىز باسقالاردان ەرەكشە جاسالعان دەپ ايتا الامىن. جۇمىستى باستاماس بۇرىن ناقتى جوسپار قۇردىق. «امەريكاعا قالاي الىپ كەلەمىز؟»، «بۇل جوبامەن قانداي جەتىستىكتەرگە جەتكىمىز كەلەدى؟» دەگەن سىندى سۇراقتارعا جاۋاپ ىزدەدىك. ال ءدامحانانى اشۋ بارىسىندا لوكاتسياعا ءمان بەردىك. چيكاگوداعى «Tary» داۋنتاۋننىڭ ورتاسىندا، ياعني وفيستەر مەن تۇرعىن ءۇي كەشەندەرى كوپ اۋداندا ورنالاسقان. قازىر بىزگە امەريكالىقتار ءجيى كەلەدى. ءبىزدىڭ باستى ماقساتىمىز — شەتەلدىكتەرگە سالت-ءداستۇرىمىزدى، ۇلتتىق اسحانامىزدى تانىستىرۋ. قازىر بۇل ويىمىز اقىرىنداپ ورىندالىپ جاتىر، -دەيدى ول.
«ءمازىردىڭ 70 پايىزى – قازاقتىڭ ۇلتتىق تاعامى»
جاس كاسىپكەر ءدامحانا بيزنەسىنىڭ دامۋىنا شەتەلدەگى قازاقتاردىڭ دا كوپ سەپتىگىن تيگىزگەندەرىن اتاپ ءوتتى.
- ءبىزدى، ەڭ الدىمەن، اقش-تاعى قازاقتار ەرەكشە قولدادى. اشىلۋىمىزعا باسقا شتاتتاردان دا كەلگەندەر بولدى. ولار ەلدىڭ تاماعىن ساعىنعاندارىن ايتادى. قازىرگى تاڭدا وتانداستىرىمىز وزدەرىنىڭ ارىپتەستەرىن، دوستارىن بىزگە ءجيى الىپ كەلەدى. بۇل دا ءبىر ۇلكەن كومەك، - دەپ ءسوزىن تولىقتىردى سىمبات.
- قازىرگى تاڭدا ءمازىرىمىزدىڭ 70 پايىزىن قازاقتىڭ ۇلتتىق تاعامدارى قۇرايدى. ولاردىڭ اراسىندا قۋىرداق، بىلامىق، مايسوك بار. ال قالعان بولىگى امەريكالىقتارعا بەلگىلى استان تۇرادى. الداعى ۋاقىتتا ءمازىردى كەڭەيتەتىن بولامىز، - دەپ ءتۇسىندىردى چيكاگو قالاسىندا قازاقتىڭ ۇلتتىق تاعامدارىن ۇسىناتىن «Tary» ءدامحاناسىن اشقان سىمبات جارقىنقىزى.
ديانا اسان
«ادىرنا» ۇلتتىق پورتالى
