20 تامىز كۇنى ءۇش وبلىستاعى 21 اۋىل اكىمىنىڭ سايلاۋى وتەدى. 2023 جىلدىڭ سوڭىنا دەيىن بارلىعى 199 ەلدى مەكەندە جاڭادان اكىمدەر سايلانادى، دەپ حابارلايدى "ادىرنا" سايتى. بۇل تۋرالى قر مەملەكەتتىك كەڭەسشىسى ەرلان قارين مالىمدەدى.
"13 تامىزدا ەلىمىزدىڭ 7 وبلىسىندا 17 اۋىلدىڭ اكىمى سايلاندى. سوڭعى ەكى جىلدا پرەزيدەنتتىڭ ساياسي رەفورمالار باعدارلاماسى اياسىندا اۋىل اكىمدەرىن حالىقتىڭ ءوزى تىكەلەي سايلايتىن بولدى. وسى ۋاقىتقا دەيىن 1 668 اۋىل، اۋىلدىق وكرۋگ، اۋداندىق ماڭىزى بار قالا اكىمدەرى سايلاندى.
ۇمىتكەرلەردىڭ 75 پايىزىن ساياسي پارتيالار ۇسىنسا، قالعان 25 پايىزى ءوزىن-ءوزى ۇسىنۋشىلار" دەپ جازدى ەرلان قارين.
سونداي-اق، ول سايلانعان اكىمدەردىڭ جارتىسىنان استامى (57,4%) بۇرىن مۇنداي قىزمەت اتقارماعانىن، بۇل اۋىل اكىمدەرىنىڭ كورپۋسى ايتارلىقتاي جاڭارعانىن ايتتى.
بۇدان بولەك جەرگىلىكتى اكىمدەردىڭ قۇرامى دا ءبىرشاما «جاسارعان». بۇگىندە سايلانعان اكىمدەردىڭ ورتاشا جاسى 45 جاستى قۇرايدى.
الداعى جەكسەنبىدە، 20 تامىز كۇنى 3 وبلىستاعى 21 اۋىل اكىمىنىڭ سايلاۋى وتەدى. 2023 جىلدىڭ سوڭىنا دەيىن بارلىعى 199 ەلدى مەكەندە جاڭادان اكىمدەر سايلانادى.
"ادىرنا" ۇلتتىق پورتالى
