وتاندىق نارىقتاعى كەي دۇكەندەردە ۋكراينا جەرىن رەسەي ايماعى رەتىندە "تاپسىرلەيتىن" گلوبۋس-كارتا ساتىلىپ جاتىر. بۇل تۋراسىندا جۋرناليست دينارا ەگەۋباەۆا حابارلاپ، كارتانىڭ سۋرەتىن الەۋمەتتىك جەلىگە جۇكتەدى، دەپ حابارلايدى "ادىرنا" ۇلتتىق پورتالى.
جۋرناليست دينارا ەگەۋباەۆا تانىمال ABDI Company جەلىسى، كەڭسە تاۋارلارى دۇكەندەرىنىڭ بىرىنەن گلوبۋس-كارتانىڭ سۋرەتىن جاريالادى.
سۋرەتتەن اڭعارعانىمىزداي، قىرىم ايماعى، لۋگانسك پەن دونەتسك قالالارى رەسەي ايماعى رەتىندە ايعاقتالعان. جۋرناليست ءوز سوزىندە كارتانىڭ رەسەي ءونىمى ەكەندىگىن، ءتىپتى، تۇتاس تاريحتىڭ بۇرمالاپ جازىلىپ جاتقانىن ايتىپ ءوتتى. مەكتەپ وقۋلىقتارىنىڭ وزىندە ۋكراينا مەملەكەتىنىڭ قالىپتاسۋى مەن ايماقتىق اتاۋلارعا قاتىستى دەرەكتەردىڭ ءوڭى اينالدىرىلىپ جازىلىپ، بالالاردىڭ ساناسى ۋلانىپ جاتىر. اۆتور مۇنداي "سويقاندىق" قازاقستانعا دا كەلە مە دەپ الاڭدايدى.
- مىنە، وسىلاي... ءبىزدىڭ بيلىكتىڭ كەلىسىمىنسىز جانە قازاقستاندىقتارعا ءوز قولىمەن وت كوسەتكەن وككۋپاتسيا بىزدە دە باستالىپ كەتتى. ازىرگە جەرىمىزدى ەمەس، وي-سانامىزدى باسىپ الىپ جاتىر. ونىڭ قاۋپىن جوققا شىعارا المايمىز، - دەيدى ەگەۋباەۆا.
ورايى كەلگەندە ايتا كەتەيىك، ەل پرەزيدەنتى قاسىم-جومارت توقاەۆ 2022 جىلى پەتەربوردا وتكەن حالىقارالىق ەكونوميكا فورۋمىندا قازاقستاننىڭ ۇستانىمىن ايقىنداپ، لۋگانسك پەن دونەتسكىنىڭ تاۋەلسىزدىگىن مويىندامايتىندىعىن حابارلاعان ەدى.
"ادىرنا" ۇلتتىق پورتالى
