ءال-فارابي اتىنداعى قازاق ۇلتتىق ۋنيۆەرسيتەتىندە كورنەكتى عالىم، ەتنوگراف، تۇركىتانۋشى ەدىگە تۇرسىنوۆتىڭ تۋعانىنا 80 جىل تولۋىنا ارنالعان حالىقارالىق عىلىمي-تەوريالىق كونفەرەنتسيا ءوتتى. «ەدىگە تۇرسىنوۆتىڭ عىلىمي مۇراسى قازىرگى گۋمانيتارلىق عىلىمداردىڭ ادىسنامالىق كونتەكسىندە» دەگەن اتاۋمەن ۇيىمداستىرىلعان شاراعا وتاندىق جانە شەتەلدىك فيلولوگ-عالىمدار، وقىتۋشى-پروفەسسورلار مەن ستۋدەنت جاستار قاتىستى.
القالى جيىندا قازۇۋ-دىڭ باسقارما توراعاسى – رەكتورى جانسەيىت تۇيمەباەۆتىڭ كونفەرەنتسيا قاتىسۋشىلارىنا ارنالعان قۇتتىقتاۋ حاتى وقىلدى. «عالىمنىڭ «قازاقتىڭ تۇرمىستىق ەرتەگىلەرىنىڭ گەنەزيسى»، «قازاق اۋىز ادەبيەتىن جاساۋشىلاردىڭ بايىرعى وكىلدەرى» سىندى ىرگەلى زەرتتەۋلەرى قازاقستاندا عانا ەمەس، شەتەلدە دە مويىندالىپ، ۇلكەن سۇرانىسقا يە بولدى. بۇل ەڭبەكتەرىندە قازاق عالىمى العاش رەت ءسىبىر جانە تۇركى-موڭعول حالىقتارىنىڭ مىڭجىلدىق سالت-داستۇرلەرىن، ادەت-عۇرپىن، ەپوستارى مەن اۋىز ادەبيەتىن، ءتىلىن، مۋزىكاسىن جاڭا عىلىمي ۇستانىمدار تۇرعىسىنان زەرتتەدى»، – دەلىندى قۇتتىقتاۋ حاتتا.
جامبىل اتىنداعى قازاق فولكلورى مەن ادەبيەتىن عىلىمي-زەرتتەۋ ورتالىعىنىڭ ديرەكتورى الماسبەك ماۋلەنوۆ ءوز سوزىندە ەدىگە دارىعۇلۇلىنىڭ تۇركى-موڭعول فولكلورى، ەپوستانۋ، ميفولوگيا جانە ەتنوگرافيانى زەرتتەۋگە باعا جەتپەس ۇلەس قوسقانىن جەتكىزدى. عالىمنىڭ عىلىمي-ادىستەمەلىك قاعيداتتارى بۇگىندە تۇركى-موڭعول فولكلورتانۋى، مۋزىكاتانۋ، ەتنوپسيحولوگيا، ەتنوگرافيا جانە ەپوستانۋ سياقتى بىرقاتار گۋمانيتارلىق عىلىمداردى زەرتتەۋدە كەڭىنەن قولدانىلاتىنىن العا تارتتى.
سونداي-اق جيىندا كورنەكتى جازۋشى، مادەنيەتتانۋشى عالىم مۇرات اۋەزوۆ، م.اۋەزوۆ اتىنداعى ادەبيەت جانە ونەر ينستيتۋتىنىڭ باس ديرەكتورى كەنجەحان ماتىجانوۆ، ق.ا.ياساۋي اتىنداعى حقتۋ پروفەسسورى شاكىر ىبىراەۆ، قىرعىز رەسپۋبليكاسى پرەزيدەنتى جانىنداعى ۇلتتىق كوميسسيا توراعاسىنىڭ ورىنباسارى جىلدىز وروزوبەكوۆا جانە وزگە دە قۇرمەتتى قوناقتار ءسوز سويلەپ، عالىمنىڭ ءومىر جانە ەڭبەك جولىنا توقتالدى.
پلەنارلىق جيىننان سوڭ كونفەرەنتسيا سەكتسيالىق وتىرىستارعا جالعاستى. وندا ەدىگە تۇرسىنوۆ ەڭبەكتەرىنىڭ ۇلتتىق جانە الەمدىك عىلىمي كەڭىستىكتەگى تاريحي-مادەني ماڭىزى، عالىمنىڭ كەشەندى-كونتسەنتريستىك كوزقاراسى جانە قازىرگى عىلىمي گۋمانيتارلىق ءبىلىمدى زەرتتەۋدەگى ادىسنامالىق ماسەلەلەر سارالاندى. سونداي-اق قازىرگى ءبىلىم بەرۋ پروتسەسى: تسيفرلاندىرۋ جاعدايىندا عالىمنىڭ جەتىستىكتەرىن مەكتەپ جانە ۋنيۆەرسيتەت بىلىمىنە ەنگىزۋ جانە ءبىلىم بەرۋ مازمۇنىن جاڭارتۋ ماسەلەلەرى تالقىلاندى.
ءال-فارابي اتىنداعى قازۇۋ-دىڭ ءباسپاسوز قىزمەتى
"ادىرنا" ۇلتتىق پورتالى
