پاۆلودار وبلىسىنا قاراستى اقسۋ قالاسىنىڭ تۇرعىندارىن قىستان امان شىعۋدىڭ قامى مازالايدى. بۇل شاھار دا ەكىباستۇزدىڭ كەبىن كيۋى مۇمكىن. سەبەبى، جەرگىلىكتى قازاندىقتار ابدەن ەسكىرگەن. ال وسىدان بەس جىل بۇرىن قۇرىلىسى باستالىپ، ميللياردتاعان قاراجات جۇمسالعان جاڭا قازاندىق ءالى دە ىسكە قوسىلماي كەلەدى. تۇرعىندار وتىنىشىنەن كەيىن اتالعان ماسەلەگە قاتىستى قر پارلامەنتى ءماجىلىسىنىڭ دەپۋتاتتىعىنا كانديدات جارقىنبەك امانتاي ۇندەۋ جاريالاپ، جاۋاپتىلاردى جازالاۋدى تالاپ ەتتى، دەپ حابارلايدى “ادىرنا” ۇلتتىق پورتالى.
اقسۋ قالاسىندا دا ەكىباستۇزداعى جاعداي قايتالانۋى مۇمكىن. سەبەبى قازىر جۇمىس ىستەپ تۇرعان قازاندىقتار ابدەن توزعان. كەز-كەلگەن ۋاقىتتا ىستەن شىعۋى ىقتيمال. ونىمەن قوسا، قالانىڭ بارلىق بولىگىنە جىلۋ تارتۋ مۇمكىن بولماي وتىر. سول سەبەپتەن وسىدان بەس جىل بۇرىن مۇندا جاڭا قازاندىق سالۋدى قولعا العان. جوسپار بويىنشا بۇل نىسان 2020 جىلى ىسكە قوسىلۋى كەرەك ەدى. الايدا، ول – «ساقالدى» قۇرىلىسقا اينالدى. اۋەل باستا جاڭا قازاندىق قۇرىلىسىنا 11 ملرد تەڭگە جۇمساۋ جوسپارلانعان ەدى. ناتيجەسىندە، «قاراجات جەتپەي جاتىر» دەگەن جەلەۋمەن وسى كۇنگە دەيىن 12 ملرد تەڭگە شىعىندالدى. بىراق، ناتيجە جوق.
ماسەلە مۇنىمەن ايقتالمايدى. جاڭا قازاندىق ىسكە قوسىلسا، جىلۋعا دەگەن تاريف بىرنەشە ەسەگە ءوسىپ كەتەدى. ايتپەگەن جاعدايدا، جوبا ءوزىن ءوزى اقتاي المايدى. ونىڭ جۇمىس ىستەۋىنە دە قىرۋار قاراجات قاجەت.
بۇل ماسەلە بويىنشا جەرگىلىكتى تۇرعىندار قر پارلامەنتى ءماجىلىسىنىڭ دەپۋتاتتىعىنا كانديدات جارقىنبەك امانتايعا شاعىمداندى. ول، ءوز كەزەگىندە، اقسۋلىقتارمەن جۇزدەسىپ، ماسەلەنى زەردەلەپ قايتتى.
اقسۋ قالاسىنىڭ تۇرعىندارىمەن كەزدەستىم. ولاردى دا ەكىباستۇزدىقتار سياقتى "جىلۋمەن نە بولادى؟» سۇراق مازالايدى. اقسۋ قازاندىعى - استاناداعى LRT سياقتى جاۋاپسىزدىقتىڭ ەسكەرتكىشىنە اينالعانداي. سوندىقتان، وعان كىنالى باسشىلاردى قازىر تاۋىپ، شەتەلگە قاشىپ كەتپەي تۇرعاندا جازالاۋ كەرەك. ەگەر قازاندىق ىسكە قوسىلسا، تاريف بويىنشا سۇراق تۋىندايدى. ول ەكى جارىم ەسە وسەدى! بارلىق شىعىندى كىنالى جاندار وتەۋى ءتيىس. اقسۋ تۇرعىندارى جانە مەملەكەتتىك بيۋدجەتى بىرەۋدىڭ قاتەلىگى ءۇشىن زارداپ شەكپەۋى ءتيىس. جالپى، بىزگە وسىنداي قازاندىق كەرەك پە؟ تاۋەلسىز ساراپشىلاردى تارتىپ، قالانى اقسۋداعى جىلۋ ەلەكتر ستانتسياسىنان قۋاتتاندىرۋ مۇمكىندىگىن زەردەلەگەن ءجون سياقتى. جەرگىلىكتى اكىمدىك وسى ماسەلەلەردى شەشۋدى دەرەۋ قولعا الۋى مىندەتتى. ايتپەسە مۇندا دا ەكىباستۇزداعى جاعداي قايتالانۋى مۇمكىن، - دەدى جارقىنبەك امانتاي.
