قوعام بەلسەندىسى، ماتەماتيكا ءپانىنىڭ مۇعالىمى دارحان ارداقۇلى الماتى قالاسىنداعى 207 مەكتەپتىڭ "ارالاس مەكتەپ" بولىپ اشىلۋىنا قارسىلىق تانىتىپ، قازاق ەلىنە ۇندەۋ تاستادى. بۇل تۋرالى "ادىرنا" ۇلتتىق پورتالى جازادى.
"الماتى قالاسىنداعى №207 مەكتەپتىڭ "ارالاس مەكتەپ" قىلىپ اشىلۋىنا جول بەرمەيمىن! كورپەنى توسەيمىن دە، جاتامىن! بۇگىن ناۋرىزباي اۋدانىنىڭ اكىمدىگى حابارلاستى. "اكىمدىكتىڭ الدىنا كەل، 410 كابينەتكە كەل. سويلەسەمىز ساعات 11.00-دە" دەپ. مەن "سەندەر وزدەرىن كەلىڭدەر! اكىم نە ىستەپ وتىر؟ دياسپورا وكىلدەرىمەن جۇمىس جاساسىن! قازاق مەكتەبىنە قاراي باعىت-باعدار بەرسىن! قازاق ەلىمەن، قازاق جەرىمەن تاعدىرىن بايلانىستىرعان دياسپورا وكىلدەرى قازاقستاندا تۇرامىن دەسە، بالالارىن قازاق مەكتەپتەرىنە بەرسىن! ءبىز ولاردى ءبولىپ جاتقان جوقپىز. كەرىسىنشە ولار ءبولىنىپ جاتىر. قازاق ءتىلدى مەكتەپتەردىڭ سانىن كوبەيتۋىمىز كەرەك. وقۋ-اعارتۋ ءمينيسترى ايماعامبەتوۆ №1 ماسەلە وسىمەن اينالىسۋى كەرەك. قۇرمەتتى اعايىندار! بالالارىڭىزدى قازاق مەكتەبىنە بەرىڭىزدەر! ارالاس مەكتەپتەردىڭ اشىلۋىنا قارسىلىق ءبىلدىرۋ كەرەكپىز. بەلسەندىلىك جانە تاباندىلىق تانىتىڭىزدار! ۇيدە جاتىپ لايك، كوممەنتاري جازىپ، ديۆاندا جاتا بەرمەڭىزدەر! №207 مەكتەپتىڭ الدىنا كەلىڭىزدەر! مەن ءوزىم مىنا مەكتەپكە كۇندە كەلەمىن. ءتىل وشسە، ءبىز دە وشەمىز. قازاق ءتىلى وشپەي، لاپىلداپ، جانىپ تۇرسا، ءبىز دە ارقاشان جانىپ تۇرامىز!", - دەدى دارحان ارداقۇلى.
"ادىرنا" ۇلتتىق پورتالى
