توقسانعا كەلگەن پاۆلودارلىق كەيۋانا حالىقتى اۋىزبىرلىككە شاقىردى. تاناي اجە بۇگىندە نەمەرە، شوبەرەلەرىن قوسقاندا 154جاننان قۇرالعان ۇلكەن اۋلەتتىڭ سۇيەنىشى، وزەگى بولىپ وتىر. 14 پەرزەنت ءسۇيىپ، ۇلىن ۇياعا، قىزىن قياعا قوندىرعان كەيۋانا پاۆلودار وبلىسىنا قاراستى اققۋلى اۋدانىندا تۇرادى. ايتا كەتەر جاي، 2019 جىلى دۇنيەگە كەلگەن شوبەرەسىنىڭ ەسىمىن ىرىمداپ، ەل پرەزيدەنتىنىڭ قۇرمەتىنە قاسىم-جومارت قويعان ەكەن.
بءۇگءىن پاۆلودار وبلىسىنا جۇمىس ساپارىمەن كەلگەن ەل پرەزيدەنتتىگىنە ۇمىتكەر قاسىم-جومارت توقاەۆتى قولداۋ جونىندەگى رەسپۋبليكالىق شتاب مۇشەلەرى تاناي نايمانبايقىزىنىڭ شاڭىراعىندا بولىپ، اجەنىڭ باتاسىن الدى.
عاسىرعا جۋىق جاساعان اجە — تالاي تاريحي كەزەڭدەردىڭ كۋاسى.
«ەلدىڭ تىنىشتىعىنا جەتەر قازىنا جوق. بۇگىنگى جاس ۇرپاق سونى ءتۇسىنۋى كەرەك. مەن اتا جۇرتىن اڭساپ كەلگەن كوپ قازاقتىڭ ءبىرىمىن. اللاعا شۇكىر، ۇرپاعىم تاۋەلسىز قازاق ەلىندە ءوسىپ، وركەندەپ كەلەدى. ەندىگى ارمانىم، وسى بەيبىت ءومىردىڭ باياندىلىعى، ۇرپاقتىڭ اماندىعى»، — دەيدى تاناي اجە.
توقسانعا كەلسە دە توپتان قالماي، ساباقتى ينەسىن قولىنان تاستامايتىن كەيۋانا ءالى دە گازەت وقىپ، ەلدەگى جاڭالىققا قۇلاعى تۇرىك جۇرەدى. اجە ەل ءۇشىن ماڭىزدى كەزەڭدەردە حالىقتى جۇدىرىقتاي جۇمىلىپ، اۋىزبىرلىكتە بولۋعا شاقىرادى.
«بەتەگە كەتىپ، بەل قالار. بەكتەر كەتىپ، ەل قالار. بەرەكەڭ كەتسە نەڭ قالار!؟». ءبىز مەملەكەتىمىز ءۇشىن ماڭىزدى شاقتاردا جۇدىرىقتاي جۇمىلىپ، اۋىزبىرلىكتە بولۋىمىز كەرەك. قازاققا قازاقتان باسقا ەشكىمنىڭ جانى اشىمايدى. بەرەكەگە بەكەم بولىڭدار»، — دەپ باتاسىن بەردى تاناي نايمانبايقىزى.
