بەلگىلى ەتنوگراف، جازۋشى، ادەبيەت زەرتتەۋشىسى، عالىم اقسەلەۋ سەيدىمبەككە قويىلعان ەسكەرتكىشكە قاتىستى ۇلىتاۋ وبلىسىنىڭ اكىمدىگى تۇسىنىك بەردى، دەپ جازادى "ادىرنا" ۇلتتىق پورتالى.
ۇلىتاۋ وبلىسىنىڭ اكىمدىگى ەسكەرتكىش بيۋدجەتتىڭ ەسەبىنەن ەمەس، تولىعىمەن دەمەۋشىلەر قارجىسىنا تۇرعىزىلعانىن جانە وعان وبلىستىق اكىمدىك ارالاسپاعانىن ايتتى.
«جاڭاارقا اۋدانىندا ەل ازاماتى اقسەلەۋ سەيدىمبەككە ارنالعان ەسكەرتكىش اشىلدى. وكىنىشكە وراي، ارينە، كوركەمدىك ورىندالۋى سىن كوتەرمەيدى. وسىعان بايلانىستى، ازداعان تۇسىنىك بەرۋ ورىندى بولار. بىرىنشىدەن، ەسكەرتكىش نە وبلىستىق، نە رەسپۋبليكالىق كوميسسيانىڭ قاراۋىنان وتكەن جوق! ياعني، بىردە-ءبىر قۇزىرلى مەملەكەتتىك ورگان ونى ماقۇلداعان جوق. دەگەنمەن، ەسكيزى اۋىزشا تۇردە اۋدان اكىمىمەن كەلىسىلگەن بولاتىن. ەكىنشىدەن، ەسكەرتكىشتى جاساپ، ورناتۋعا بيۋدجەتتەن ءبىر تەڭگە دە جۇمسالماعان. تولىعىمىن دەمەۋشىلەردىڭ قارجىسىنا ىستەلگەن. ۇشىنشىدەن، جانە، ەڭ باستىسى، ەسكەرتكىشتى جاساۋعا تاپسىرىستى اقسەلەۋ اقساقالدىڭ تۋعان-تۋىستارى جاسادى. وبلىس اكىمدىگى بۇعان ارالاسقان جوق. بۇل تۇسىنىكتەمەنى جازۋدىڭ سەبەبى اقتالۋ ەمەس، بىراق تۇسىنىك بەرۋ. ەندى بۇل ماسەلەمەن اۋدان بولىپ، وبلىس بولىپ اينالىسامىز، ورىن العان ولقىلىقتى تۇزەتەمىز»، - دەدى ۇلىتاۋ وبلىسى اكىمىنىڭ ورىنباسارى عالىمجان قۇسمانعالي.
جاڭاارقا اۋدانىنىڭ اكىمدىگى بولسا ەسكەرتكىش تاپسىرىس بەرۋشىلەرگە كەرى قايتارىلىپ، ورنىنا باسقا ەسكەرتكىش ورناتىلاتىنىن مالىمدەدى.
"جاڭاارقا اۋدانى، جاڭاارقا كەنتىندە اقسەلەۋ سلانۇلى سەيدىمبەككە ارنالىپ ەسكەرتكىش بوي كوتەرگەن بولاتىن. بۇل ەسكەرتكىشتى اقسەلەۋ سلانۇلىنىڭ ءىنىسى اسىلحان سەيدىمبەك ءوز قاراجاتى ەسەبىنەن جاساتىپ، بارلىق قۇجاتتارى دۇرىس ەكەندىگىن جەتكىزگەن. الايدا، بۇگىنگى كۇنى جاڭادان اشىلعان ەسكەرتكىشكە قاتىستى ازاماتتار تاراپىنان بىرقاتار نارازىلىقتار تۋىنداۋدا. اقسەلەۋ ءمۇسىنى مەنىڭ دە كوڭىلىمنەن شىقپادى. وسىعان وراي، ەسكەرتكىشتى تاپسىرىس بەرۋشىلەرگە قايتارۋ تۋرالى شەشىم قابىلداندى. ورنىنا تالاپقا ساي، تۇلعانىڭ بەينەسىنە سايكەس كەلەتىن ەسكەرتكىش قويۋ ءۇشىن ءتيىستى شارالار قولدانىلاتىن بولادى", - دەدى جاڭاارقا اۋدانىنىڭ اكىمى يۋرجان بەكقوجين.
"ادىرنا" ۇلتتىق پورتالى
