Қырғызстандағы телеарналар эфирлік хабар таратудағы қырғыз тіліндегі бағдарламалардың үлесін 60 пайызға дейін арттыруы тиіс. Бұл талап қолданыстағы заңнамада көзделген. Бұл туралы 16 қаңтар күні медиа өкілдерімен өткен жиында мәдениет, ақпарат және жастар саясаты министрінің орынбасары Марат Тағаев мәлімдеді, деп хабарлайды “Адырна”.
Оның айтуынша, телеарналар ақпан айының соңына дейін «Қырғызфильм» және «Қырғызсериал» ұйымдарымен келісімшарт жасасуы қажет. Мемлекет телеарналарды ұлттық тілдегі контентпен қамтамасыз ету мақсатында бұл мекемелердің қорынан 400-ден астам фильм, 40 мультфильм және 10 сериалды тегін ұсынған.
Тағаев заң талаптарының, әсіресе тілге қатысты нормалардың қатаң сақталуы керегін атап өтті. Оның сөзінше, кейбір жекеменшік телеарналар қырғыз тіліндегі ескі бағдарламаларды қайта көрсету арқылы талапты формалды түрде орындап отыр, алайда жаңа отандық контент өндірмейді.
Еске салсақ, 2024 жылдың тамыз айында Қырғызстанда телехабар таратуда мемлекеттік тілдің қолданылуына қатысты заңға өзгерістер енгізіліп, қырғыз тіліндегі бағдарламалардың үлесі 50 пайыздан 60 пайызға дейін арттырылған болатын.
«Азаттық радиосының» мәліметінше, Қырғызстандағы шетелдік телеарналар арасында ресейлік «Бірінші арна», «Россия 24», «Мәдениет» және «Звезда» арналары кеңінен таралған.
