الماتىدا العاشقى كرەماتوريدى اشۋعا دايىندىق جۇرگىزىلىپ جاتىر. بۇل تۋرالى الماتى قالاسى قوعامدىق دەنساۋلىق ساقتاۋ باسقارماسىنىڭ ءباسپاسوز قىزمەتى مالىمدەدى، دەپ حابارلايدى "ادىرنا".
مالىمەتە سۇيەنسەك، 2026 جىلعى 9 قاڭتاردا قازاقستان رەسپۋبليكاسىنىڭ ادىلەت مينيسترلىگىندە ۇلتتىق ەكونوميكا مينيسترلىگىنىڭ تيپتىك جەرلەۋ ەرەجەلەرى مەن قابىردى كۇتۋ ءىسىن ۇيىمداستىرۋ تارتىبىنە وزگەرىستەر ەنگىزۋدى كوزدەيتىن بۇيرىعى تىركەلگەن.
"جاڭا ەرەجەلەر كرەماتوريلەردىڭ قىزمەتىنە قۇقىقتىق نەگىز جاسايدى جانە قازاقستاندا كرەماتسيانى العاش رەت زاڭ دەڭگەيىندە جۇرگىزۋگە مۇمكىندىك بەرەدى", – دەلىنگەن الماتى قالاسى قوعامدىق دەنساۋلىق ساقتاۋ باسقارماسى ءباسپاسوز قىزمەتىنىڭ حابارلاماسىندا.
بۇيرىق كۇشىنە ەنگەننەن كەيىن الماتىداعى كرەماتوري بارلىق سانيتارلىق جانە قۇقىقتىق تالاپتاردى ساقتاي وتىرىپ جۇمىسىن باستايدى.
قازىرگى تاڭدا قالا پاتولوگواناتوميالىق بيۋروسىنىڭ قاداعالاۋ كەڭەسى ارقىلى كرەماتسيا قىزمەتتەرىنىڭ باعا تىزبەسى بەكىتىلۋ ۇستىندە. قىزمەتتەردىڭ تاريفتەرى مەن كورسەتىلۋ ءتارتىبى رەسمي سايتتا جاريالاناتىن بولادى.
قالالىق كرەماتوريدى سالۋ جوسپارلارى العاش رەت 2020 جىلعى جازدا جاريالانعان.
قۇرىلىس اياقتالعاننان كەيىن ونىڭ ىسكە قوسىلۋ مەرزىمى بىرنەشە رەت كەيىنگە شەگەرىلدى. اكىمدىك بۇل جاعدايدى ءتۇسىندىرىپ، 2024 جىلدىڭ سوڭىندا وبەكتى پايدالانۋعا بەرىلگەننەن كەيىن ونىڭ سوڭعى بالانستىق يەسىن انىقتاۋ ماسەلەسى تۋىنداعانىن، ويتكەنى كرەماتوريلەر قىزمەتىن رەتتەيتىن سانيتارلىق ەرەجەلەردە ءتيىستى نورمالار بولماعانىن حابارلاعان ەدى.
