قازاقستان رەسپۋبليكاسىنىڭ مادەنيەت جانە اقپارات مينيسترلىگى 2026 جىلى وتەتىن 61-ءشى ۆەنەتسيا بيەننالەسىندە قر ۇلتتىق پاۆيلونىنا ارنالعان كۋراتورلىق ۇسىنىستار كونكۋرسىنىڭ قورىتىندىسىن جاريالادى.
داۋىس بەرۋ ناتيجەسى بويىنشا «قوڭىر: ارحيۆ ءۇنى» تۇجىرىمداماسى جەڭىمپاز اتاندى. جوبانىڭ كۋراتورى – سىرلىبەك بەكبوتاەۆ.
61-ءشى ۆەنەتسيا بيەننالەسى 2026 جىلعى 9 مامىر مەن 22 قاراشا ارالىعىندا وتەدى. وسى مەرزىمدە قازاقستاننىڭ ۇلتتىق پاۆيلونى بيەننالە باعدارلاماسى اياسىندا ۇسىنىلاتىن بولادى.
كونكۋرس ۇلتتىق پاۆيلوندى دايىنداۋدا اشىق ءارى تۇراقتى تاجىريبەنى قالىپتاستىرۋ ماقساتىندا ۇيىمداستىرىلدى. وتىنىمدەر ءبىر اي بويى قابىلداندى. ىرىكتەۋ ەكى كەزەڭنەن تۇردى. ءبىرىنشى كەزەڭدە ۇسىنىلعان ماتەريالدارعا ساراپتامالىق باعالاۋ جاسالدى، ال ەكىنشىسىندە فيناليستەرمەن ونلاين-سۇحبات جۇرگىزىلدى.
باعالاۋ ءۇشىن جوبانىڭ تۇجىرىمدامالىق تۇتاستىعىنا (25 باللعا دەيىن), مەنەدجمەنتى مەن ىسكە اسىرىلۋى (20 باللعا دەيىن), تاجىريبە، ەتيكا جانە ورنىعۋىنا (20 باللعا دەيىن) ءمان بەرىلدى. ءار سۇراق بويىنشا 1-دەن 5 بالعا دەيىن قويىلىپ، قورىتىندى ناتيجە ۇپاي ارقىلى انىقتالدى.
ءبىرىنشى كەزەڭنىڭ فينالىنا ءۇش جوبا ءوتتى. ەكىنشى كەزەڭدە قازىلار القاسى ءاربىر فيناليسپەن ونلاين-سۇحبات وتكىزىپ، تالقىلاۋ قورىتىندىسى بويىنشا اقتىق داۋىس بەرۋ پاراقتارىن تولتىردى.
ىرىكتەۋ كوميسسياسى پانارالىق ساراپتاما قاعيداتى بويىنشا قۇرىلىپ، ونىڭ قۇرامىندا زاماناۋي ونەر، ونەرتانۋ، تاۋەلسىز تەاتر مەن مۋزىكا سالالارىنداعى جەرگىلىكتى جانە حالىقارالىق ماماندار، سونداي-اق اكادەميالىق قاۋىمداستىق پەن مەملەكەتتىك مۋزەيلەر وكىلدەرى بولدى.
ەسكە سالا كەتەيىك، كونكۋرس 2025 جىلدىڭ قاراشا ايىندا جاريالانعان بولاتىن. ونىڭ ماقساتى – 2026 جىلى بيەننالەدە «In Minor Keys» تاقىرىبىن اشاتىن، تۇجىرىمدامالىق جانە كوركەمدىك تۇرعىدان ءبىرتۇتاس جوبانى ىرىكتەۋ جانە قازاقستاننىڭ زاماناۋي ونەرىن حالىقارالىق دەڭگەيدە تانىستىرۋ.
كونكۋرسقا كۋراتورلار مەن كۋراتورلىق توپتارعا قازاقستان رەسپۋبليكاسىنىڭ ازاماتتارى، كۋراتورلىق قىزمەت تاجىريبەسى بار ماماندار شاقىرىلدى. قازاقستاندا تۇراتىن جانە جۇمىس ىستەيتىن ۇمىتكەرلەرگە باسىمدىق بەرىلدى.
سىرلىبەك بەكبوتاەۆ – سۋرەتشى ءارى كۋراتور، استانا قالاسىندا تۇرىپ، جۇمىس ىستەيدى. ونىڭ شىعارماشىلىعى مەن مول تاجىريبەسى كوشپەندىلەر ءومىرى مەن مادەني مۇرا تاقىرىبىنا ارنالعان. 2025 جىلى ول ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىن «مادەنيەتتانۋ» ماماندىعى بويىنشا تامامداعان.
