كەشەدەن بەرى بىرقاتار اقپارات كوزدەرىندە اقش-تىڭ Washington Post گازەتىندە ماڭعىستاۋ ءوڭىرى تۋرالى كەڭ كولەمدى ماقالا جارىق كورگەنى ايتىلۋدا. ماقالا اۆتورى - امەريكالىق جۋرناليست دجەننيفەر ميۋللەر. سونىمەن قاتار، الەم ەلدەرىنە Jordan LG ەسىمىمەن تانىمال ساياحاتشى ءارى فوتوگرافتىڭ ماڭعىستاۋ وبلىسىنا كەلىپ، تۇبەكتىڭ بىرەگەي تابيعي لاندشافتتارىن حالىقارالىق اۋديتورياعا تانىستىرعانى جونىندە دە جاعىمدى جاڭالىقتار تارادى.
بۇل اتالعان تۇلعالاردى كوپشىلىگىمىز تانىماۋىمىز مۇمكىن. الايدا ەڭ باستىسى - ولاردىڭ حالىقارالىق دەڭگەيدەگى كەڭ اۋديتورياسى ارقىلى ماڭعىستاۋ ءوڭىرىنىڭ الەمگە ناسيحاتتالۋى. بۇل، ءسوزسىز، ءوڭىر ءتۋريزمى ءۇشىن ۇلكەن مۇمكىندىك ءارى ۇزاق مەرزىمدى ناتيجە بەرەتىن قادام دەپ بىلەمىن.
وسى ورايدا، مەن دە وسى سالادا بىرنەشە جىلدان بەرى قىزمەت ەتىپ جۇرگەن سوڭ ءوز پىكىرىمدى بىلدىرگىم كەلەدى.
ماڭعىستاۋ ءوڭىرىنىڭ بىرەگەي ءارى كوركەم تابيعاتىن شەتەل ەلدەرىنە كەڭىنەن تانىتۋ باعىتىندا اقپارات ءالى دە جەتكىلىكسىز. قازىرگى تىلمەن ايتقاندا، حالىقارالىق دەڭگەيدەگى جۇيەلى پيار جۇمىستارى ءالسىز. وسى ولقىلىقتىڭ ورنىن تولتىرۋ ءۇشىن شەتەلدىك تانىمال تۇلعالاردى، بلوگەرلەردى، ساياحاتشىلاردى وڭىرگە ارنايى قوناق رەتىندە شاقىرىپ، ماڭعىستاۋدىڭ تابيعي، تاريحي جانە تۋريستىك الەۋەتىن ولاردىڭ اۋديتورياسى ارقىلى ناسيحاتتاۋ قاجەت دەپ ەسەپتەيمىن.
وڭىرگە كەلگەن شەتەلدىك تۋريستەرمەن تىكەلەي پىكىر الماسۋ بارىسىندا بۇل باستامانىڭ اسا ماڭىزدى ەكەنىنە كوزىم 100% جەتتى. سەبەبى كوپشىلىگى ماڭعىستاۋ تۋرالى بۇرىن مۇلدە ەستىمەگەنىن نەمەسە وتە از اقپارات بىلەتىنىن ايتادى. ال تابيعاتتى ءوز كوزىمەن كورگەننەن كەيىن ولاردىڭ تاڭدانىسى مەن قىزىعۋشىلىعى ەرەكشە ارتادى.
وسىنداي ماقساتتى جارناما مەن دۇرىس باعىتتالعان اقپاراتتىق جۇمىس ناتيجەسىندە تۋريستەر سانى كوبەيىپ، سۇرانىس ارتا تۇسەدى. ءوز كەزەگىندە بۇل وڭىردەگى تۋريستىك قىزمەتتەردىڭ ساپالى دامۋىنا، جاڭا قىزمەت تۇرلەرىنىڭ قالىپتاسۋىنا، ينفراقۇرىلىمنىڭ جاقسارۋىنا جانە جەرگىلىكتى حالىقتىڭ تابىسىنىڭ وسۋىنە وڭ ىقپال ەتەدى.
