بۇگىن ۇلىتاۋ وبلىسى قوعامدىق دامۋ باسقارماسىنىڭ ۇيىمداستىرۋىمەن «زاڭ مەن ءتارتىپ: قوعامدىق قاۋىپسىزدىكتى قامتاماسىز ەتۋدەگى مەملەكەتتىك ورگانداردىڭ ءرولى» تاقىرىبىندا اقپاراتتىق-ءتۇسىندىرۋ سەمينار-كەزدەسۋ ءوتتى. ءىس-شارا «زاڭ مەن ءتارتىپ» قاعيداتىن ىلگەرىلەتۋ اياسىندا ۇيىمداستىرىلدى.
كەزدەسۋدىڭ نەگىزگى ماقساتى – قوعامدىق قاۋىپسىزدىكتى قامتاماسىز ەتۋدەگى مەملەكەتتىك ورگانداردىڭ قىزمەتىن ءتۇسىندىرۋ، ازاماتتاردىڭ قۇقىقتىق مادەنيەتىن ارتتىرۋ، سونداي-اق مەملەكەتتىك ورگاندار مەن ازاماتتىق قوعام اراسىنداعى ءوزارا ىقپالداستىقتى نىعايتۋ.
ءىس-شاراعا ارحيۆ جانە كىتاپحانا قىزمەتكەرلەرى، قوعامدىق كەلىسىم سالاسىنىڭ ماماندارى، قۇقىق قورعاۋ ورگاندارىنىڭ وكىلدەرى، سونداي-اق ۇكىمەتتىك ەمەس ۇيىم مۇشەلەرى قاتىستى. كەزدەسۋ اشىق ديالوگ فورماتىندا ءوتىپ، قاتىسۋشىلار وزدەرىن تولعاندىرعان سۇراقتارىن قويىپ، ناقتى ءارى مازمۇندى جاۋاپتار الدى.
جيىن بارىسىندا قازىرگى قوعامدا وزەكتى بولىپ وتىرعان الاياقتىقتىڭ الدىن الۋ ماسەلەسىنە ەرەكشە نازار اۋدارىلدى. سوڭعى جىلدارى تەلەفون جانە ينتەرنەت ارقىلى جاسالاتىن الاياقتىق ارەكەتتەردىڭ جيىلەپ كەتكەنى، اسىرەسە اعا بۋىن وكىلدەرىنىڭ ءجيى الدانىپ قالاتىنى ايتىلدى. وسى باعىتتا وبلىستىق پروكۋراتۋرانىڭ قوعامدىق مۇددەلەردى قورعاۋ باسقارماسىنىڭ اعا پروكۋرورى جالعاس بازاربايۇلى تولەنوۆ ءتۇسىندىرۋ جۇمىستارىن جۇرگىزىپ، الاياقتىقتان ساقتانۋ جولدارىنا توقتالدى.
سونىمەن قاتار، پوليتسيا دەپارتامەنتىنىڭ اكىمشىلىك پوليتسيا باسقارماسى باستىعىنىڭ ورىنباسارى، پوليتسيا پودپولكوۆنيگى ارمان مۇحامەتجانۇلى ابيلكاسيموۆ قوعامدىق ءتارتىپتى ساقتاۋ جانە قۇقىق بۇزۋشىلىقتاردىڭ الدىن الۋ باعىتىنداعى جۇمىستارمەن تانىستىردى.
كەزدەسۋدە «Amanat» پارتياسى ۇلىتاۋ وبلىستىق فيليالىنىڭ پارتيالىق باقىلاۋ جونىندەگى ينسپەكتورى ەرشات مومىنبايۇلى اۋباكيروۆ ازاماتتىق جاۋاپكەرشىلىكتىڭ ماڭىزدىلىعىنا توقتالسا، ۇكىمەتتىك ەمەس ۇيىمدار اتىنان ۇلىتاۋ جاستارى قوعامدىق بىرلەستىگى توراعاسىنىڭ ورىنباسارى باقىت بولاتوۆنا بولاتوۆا ازاماتتىق قوعامنىڭ قۇقىقتىق مادەنيەتتى قالىپتاستىرۋداعى رولىنە نازار اۋداردى.
سونداي-اق، مەملەكەتتىك قۇقىقتىق جۇمىس ءبولىمىنىڭ باسشىسىنىڭ مىندەتىن اتقارۋشى قۇرالاي تەمىربەكوۆنا قالماعانبەتوۆا زاڭنامالىق وزگەرىستەر مەن ازاماتتاردىڭ قۇقىقتارىن قورعاۋ تەتىكتەرى تۋرالى اقپارات بەردى.
كەزدەسۋ قورىتىندىسىندا قاتىسۋشىلار مۇنداي اشىق ديالوگتاردىڭ قۇقىقتىق ساۋاتتىلىقتى ارتتىرۋعا، قوعامدىق قاۋىپسىزدىكتى نىعايتۋعا جانە قوعامداعى تۇراقتىلىقتى قامتاماسىز ەتۋگە وڭ اسەر ەتەتىنىنە سەنىم ءبىلدىردى.
ءىس-شاراعا قاتىسىپ، ءوز تاجىريبەسىمەن بولىسكەن بارلىق سپيكەرلەرگە جانە بەلسەندىلىك تانىتقان قاتىسۋشىلارعا العىس ءبىلدىرىلدى.
