«ونەگەلى ۇرپاق» اپتالىعى اياسىندا شىمكەنتتە قاريالار مەن ارداگەرلەر ءۇيىن تازالاۋ، شوپتەرىن ورىپ، قوقىستاردى شىعارۋ، اعاشتاردى اكتەۋ جۇمىستارى جۇرگىزىلىپ، قۇرمەت كورسەتىلۋدە.
«تازا قازاقستان» اكتسياسى اياسىندا شىمكەنت قالاسى اكىمىنىڭ ورىنباسارى سارسەن ابايۇلى باستاعان ءبىر توپ بەلسەندىلەر، ستۋدەنت جاستار، ەرىكتىلەر ۇوس ارداگەرى نينا موسۋنوۆانىڭ شاڭىراعىنا باس سۇقتى. جاستار اۋلانى تازارتىپ، اعاش تۇپتەرىن قوپسىتتى. قورشاۋلاردى سىرلادى.
بۇگىندە شىمكەنتتە ەكى-اق سوعىس ارداگەرى قالعان. سونىڭ ءبىرى – نينا موسۋنوۆا. قاريا بيىل 100-گە كەلىپ وتىر. ول 1942 جىلى اسكەرگە ءوز ەركىمەن اتتانىپ، موجايسك ماڭىنداعى سوعىستا قولىنا پۋلەمەت الىپ جاۋعا قارسى شىققان. سوعىستان سوڭ كاسسير، كىتاپحاناشى، حاتشى-ماشينيستكا بولعان. قازىرگى تاڭدا 2 نەمەرە، 5 شوبەرە ءسۇيىپ وتىر.
– بىزگە بەيبىت ءومىر سىيلاعان ۇلى وتان سوعىسىنىڭ جانە تىل ارداگەرلەرىنىڭ ەرلىگىن باعالاۋ – ءبىزدىڭ پارىزىمىز. ءبىز – ارداگەرلەرىمىزدى ارداقتاپ، قارتتارىمىزدى قادىرلەيتىن حالىقپىز. ەندىگى پارىزىمىز كوزى تىرىسىندە وسى كىسىلەرگە بارىنشا قامقورلىق جاساپ، كومەگىمىزدى اياماۋ. سىزگە ۇلى جەڭىس پەن بۇگىنگى بەيبىت كۇندەرىمىز ءۇشىن العىس ايتامىز، – دەدى شىمكەنت قالاسى اكىمىنىڭ ورىنباسارى سارسەن قۇرانبەك.
نينا اجەي قالا ورتالىعىنداعى الاقانداي ۇيدە نەمەرەسىنىڭ قامقورلىعىندا تۇرىپ جاتىر. جينالعان جاستارعا ريزاشىلىعىن ايتىپ، جىلاپ قالدى. وتان ءۇشىن وتقا ءتۇسىپ، قان مايداندا جەتكەن جەڭىسى، بۇگىنگى بەيبىت ءومىر ءۇشىن باس ءيىپ، العىس ءبىلدىردى. «ەندى سوعىس دەگەن زۇلماتتى جاستار كورمەسىن. ەلىمىزدە تەك بەيبىتشىلىك بولسىن» دەدى قارت انا.
