2026 جىل تسيفرلاندىرۋ جانە جاساندى ينتەللەكت جىلى بولىپ جاريالاندى. بۇل تۋرالى پرەزيدەنت قاسىم-جومارت توقاەۆ مالىمدەدى، دەپ حابارلايدى «ادىرنا» ءتىلشىسى.
مەملەكەت باسشىسىنىڭ ايتۋىنشا، جىلقى جىلى قازاقستان جاڭعىرۋدىڭ جاڭا كەزەڭىنە قادام باسادى.
«مەن بيىلعى جولداۋىمدا تسيفرلىق مەملەكەت بولۋىمىز كەرەكتىگىن جاريالادىم. سوندىقتان 2026 جىلدى تسيفرلاندىرۋ جانە جاساندى ينتەللەكت جىلى دەپ اتاۋ تۋرالى شەشىم قابىلدادىم. وزىق تەحنولوگيالار ەلىمىزدىڭ بارلىق سالاداعى الەۋەتىن ارتتىرۋعا جول اشپاق»،- دەدى ول.
ودان بولەك، پرەزيدەنت شاعىن جانە ورتا بيزنەستىڭ ءاردايىم مەملەكەت نازارىندا بولاتىنىن اتاپ ءوتتى.
«بارلىق وڭىردە جاڭا كاسىپورىندار اشىلىپ، جولدار جوندەلەدى، سونداي-اق تۇرعىن ۇيلەر، مەكتەپتەر، دەنساۋلىق ساقتاۋ، سپورت جانە مادەنيەت نىساندارى بوي كوتەرەدى»،-دەپ تولىقتىردى قاسىم-جومارت توقاەۆ.
