«قازاقمىس» كورپوراتسياسى Qazaq Stroy كومپانياسىنىڭ باسقارۋىنا ءوتتى. بۇل تۋرالى CMN.KZ جازدى, دەپ حابارلايدى «ادىرنا» ءتىلشىسى.
«اقپاراتتى Qazaq Stroy كومپانياسى رەسمي تۇردە راستادى»،-دەلىنگەن حابارلامادا.
«قازاقمىستىڭ» مەنشىك يەسىن وزگەرتۋ تۋرالى قاۋەسەتتەر وتكەن كۇزدە-اق تاراي باستاعان ەدى. الايدا ۇزاق ۋاقىت بويى بۇل مالىمەتتى تاراپتاردىڭ ەشقايسىسى ناقتىلامادى. تەك 10 جەلتوقساندا اكتسيونەرلىك قوعام وكىلدەرى رەسمي ءباسپاسوز حابارلاماسىن تاراتىپ، «قازاقمىس» كورپوراتسياسىنا باقىلاۋدى وزگەرتۋ ءراسىمى مەن رامالىق كەلىسىمگە قول قويىلعانىن مالىمدەگەن. مامىلەنى جاڭا جىلعا دەيىن جابۋ جوسپارلانعان.
مىس الىبىنىڭ جاڭا يەسى — كوپسالالى Qazaq Stroy كومپانيالار توبى. توپتىڭ بەنەفيتسيارى — كاسىپكەر نۇرلان ارتىقباەۆ. 2024 جىلعى دەرەك بويىنشا، ول قازاقستانداعى ەڭ باي ادامدار تىزىمىندە 44-ورىندا تۇرعان، ال بايلىعى 228 ملن دوللار دەپ باعالانعان.
Forbes دەرەكتەرىنە سايكەس، Kazakhmys كورپوراتسياسىنىڭ جىلدىق تابىسى 1,3 ترلن تەڭگەنى قۇرايدى، ال قىزمەتكەرلەر سانى 32 مىڭنان اسادى. حولدينگ قۇرامىنا قاراعاندى، ۇلىتاۋ، جامبىل جانە اباي وبلىستارىنداعى كەنىشتەر، بايىتۋ فابريكالارى مەن مىس بالقىتۋ زاۋىتتارى كىرەدى.
Qazaq Stroy كومپانيالار توبى قازاقتەلەكوم كومپانياسىنداعى ۇلەسكە جانە گاز كەن ورنىنداعى 75 پايىزدىق ۇلەسكە يەلىك ەتەدى. سونىمەن قاتار، توپ تۇركىستان وبلىسىندا جىلىنا 800 مىڭ توننا ءونىم شىعاراتىن كۇكىرت قىشقىلى زاۋىتىن سالۋ جوباسىن جۇزەگە اسىرىپ جاتقان كومپانيانىڭ تەڭ يەسى سانالادى.
بۇدان بولەك، Qazaq Stroy توبىنا كىرەتىن Qazaq Kalium كومپانياسىنا باتىس قازاقستان وبلىسىندا ورنالاسقان الەمدەگى ەڭ ءىرى كالي تۇزدارى كەن ورىندارىنىڭ ءبىرى تيەسىلى. جوسپارعا سايكەس، 2027 جىلدىڭ سوڭىنا قاراي كالي تىڭايتقىشتارىن وندىرەتىن تاۋ-كەن بايىتۋ كەشەنى ىسكە قوسىلادى. قۇرىلىس جۇمىستارىن نەمىستىڭ Thyssen Schachtbau GmbH كومپانياسى جۇرگىزىپ جاتىر. كاسىپورىننىڭ جوبالىق قۋاتى جىلىنا 6 ملن توننا ءونىمدى قۇراپ، 4 مىڭ تۇراقتى جۇمىس ورنىن اشۋ كوزدەلگەن. بۇل جوباعا Qazaq Stroy توبى قارجى ينستيتۋتتارىمەن بىرلەسىپ شامامەن 2,4 ملرد دوللار ينۆەستيتسيا سالماق. ءدال وسى زاۋىت قازاقستاننىڭ كالي تىڭايتقىشتارىن ءوندىرۋ بويىنشا الەمدەگى توپ-5 ەلدىڭ قاتارىنا ەنۋىنە مۇمكىندىك بەرەدى.
ايتا كەتەيىك، Qazaq Stroy كومپانيالار توبى الەۋمەتتىك باعىتتاعى جوبالاردى جۇيەلى تۇردە جۇزەگە اسىرىپ كەلەدى. سوڭعى 10 جىلدا كاسىپورىن جالپى اۋماعى 4,8 ملن شارشى مەتردەن اساتىن تۇرعىن ءۇي سالدى. سونىڭ ىشىندە 3,6 ملن شارشى مەترى — الەۋمەتتىك تۇرعىن ءۇي. سونىمەن قاتار كومپانيا جىل سايىن كوپبالالى جانە از قامتىلعان وتباسىلارعا 100 پاتەردەن تەگىن بەرىپ وتىرادى.
