قىرعىزستاننىڭ بۇرىنعى پرەزيدەنتى المازبەك اتامباەۆ مەملەكەتتىك ناگرادالارىنان ايىرىلدى. ءتيىستى جارلىققا ەلدىڭ قازىرگى پرەزيدەنتى سادىر جاپاروۆ قول قويدى، دەپ حابارلايدى «ادىرنا» ءتىلشىسى.
اتامباەۆ قىرعىز رەسپۋبليكاسىنىڭ ەڭ جوعارى ايرىقشا بەلگىسى — «قىرعىز رەسپۋبليكاسىنىڭ باتىرى» اتاعىنان، II دارەجەلى «ماناس» وردەنىنەن، «داناكەر» وردەنىنەن جانە «داڭق» مەدالىنەن ايىرىلدى. سونىمەن قاتار جاپاروۆ بۇل ناگرادالاردى بەرۋ تۋرالى بۇرىنعى جارلىقتاردىڭ كۇشىن جويدى.
قۇقىق قورعاۋ ورگاندارىنا اتالعان ناگرادالاردى تاركىلەپ، مەملەكەتتىك ناگرادالار قورىنا تاپسىرۋ مىندەتتەلدى.
ايتا كەتەيىك، المازبەك اتامباەۆ 2011 جىلعى جەلتوقساننان 2017 جىلعى قاراشاعا دەيىن قىرعىزستان پرەزيدەنتى قىزمەتىن اتقاردى.
2020 جىلى ول قىلمىستىق توپ وكىلى ازيز باتۋكاەۆتى زاڭسىز بوساتۋ ءىسى بويىنشا 11 جىل 2 ايعا باس بوستاندىعىنان ايىرىلعان بولاتىن. كەيىن بۇل ۇكىمنىڭ كۇشى جويىلىپ، ءىس قايتا قاراۋعا جىبەرىلدى.
2023 جىلدىڭ اقپان ايىندا اتامباەۆ كولونيادان بوساتىلعان ەدى. ول بوستاندىققا شىققاننان كەيىن كەلەسى كۇنى ەمدەلۋگە يسپانياعا ۇشىپ كەتكەن. سوت وعان شەتەلدە ەمدەلۋگە رۇقسات بەرگەن. سودان بەرى ول ەلگە ورالماعان.
2025 جىلعى ماۋسىمدا اتامباەۆ سىرتتاي 11,5 جىلعا باس بوستاندىعىنان ايىرىلىپ، مۇلكىن تاركىلەۋ جانە مەملەكەتتىك ناگرادالارىنان ايىرۋ جازاسىنا كەسىلدى. بۇل ۇكىم قوي-تاش اۋىلىندا جەر تەلىمدەرىن زاڭسىز الۋ، زاڭسىز بايۋ جانە 2019 جىلعى تامىزدا قوي-تاش اۋىلىندا بولعان تارتىپسىزدىكتەرگە قاتىسۋ فاكتىلەرى بويىنشا شىعارىلدى.
قىرعىزستان پارلامەنتى 2019 جىلى وسى ارەكەتتەرىنە بايلانىستى ايىپتالعان المازبەك اتامباەۆتى ەكس-پرەزيدەنت رەسمي مارتەبەسىنەن ايىرعان بولاتىن. بۇل ونى تيىسىنشە وعان تيىسپەۋ (يممۋنيتەت) قۇقىعىنان دا ماحرۇم ەتكەن. وسى ارەكەتتەر بۇرىنعى باسشىنى جاۋاپقا تارتۋعا جول اشقان.
