الەۋمەتتىك جەلىلەردە استاناداعى تۇنگى كلۋبتاردىڭ ءبىرىنىڭ ماڭىندا بولعان توبەلەس تۋرالى اقپارات تارادى. اتالعان وقيعا سالدارىنان 18 جاستاعى جىگىت قازا تاپتى، دەپ حابارلايدى «ادىرنا» ءتىلشىسى.
وقيعاعا قاتىستى مالىمەتتەر Threads پلاتفورماسىندا جاريالاندى. جەلى قولدانۋشىسىنىڭ ايتۋىنشا، مەكەمە ماڭىندا جاس جىگىتكە پىشاق سۇعىلعان.
استانا قالالىق پوليتسيا دەپارتامەنتىنىڭ مالىمەتىنشە، بۇل دەرەك بويىنشا جابىرلەنۋشىنىڭ ولىمىنە اكەپ سوققان قاساقانا اۋىر دەنە جاراقاتىن كەلتىرۋ بابى بويىنشا سوتقا دەيىنگى تەرگەۋ باستالعان.
«پوليتسيا قىزمەتكەرلەرى ەكى كۇدىكتىنى ۇستادى، ولار ۋاقىتشا ۇستاۋ يزولياتورىنا قامالدى. انىقتالعانداي، تۇنگى ويىن-ساۋىق ورىندارىنىڭ ءبىرىنىڭ ماڭىندا جاستار اراسىندا اۋىزشا جانجال تۋىنداپ، ول توبەلەسكە ۇلاسقان. سونىڭ سالدارىنان 18 جاستاعى ازامات العان جاراقاتتارىنان كوز جۇمدى»،- دەلىنگەن حابارلامادا.
قازىرگى ۋاقىتتا تەرگەۋ امالدارى جۇرگىزىلىپ، وقيعانىڭ بارلىق ءمان-جايى انىقتالۋدا.
