مولدوۆا بيلىگى كيشينەۆتە جۇمىس ىستەپ كەلگەن «ورىس ءۇيى» – رەسەي عىلىم جانە مادەنيەت ورتالىعىنىڭ قىزمەتىنە نەگىز بولعان مەملەكەتارالىق كەلىسىمدى بۇزۋ (دەنونساتسيالاۋ) تۋرالى رەسەي تاراپىن رەسمي تۇردە حاباردار ەتتى. بۇل تۋرالى جۋرناليستەرگە مولدوۆانىڭ سىرتقى ىستەر ءمينيسترى ميحاي پوپشوي مالىمدەدى، دەپ حابارلايدى “ادىرنا”.
ونىڭ ايتۋىنشا، رەسەي جاعى بۇل شەشىم تۋرالى الدەقاشان حابارلانعان. قولدانىستاعى كەلىسىم ەرەجەلەرىنىڭ مەرزىمى اياقتالاتىن 2026 جىلدىڭ ماۋسىم ايىنىڭ سوڭى – شىلدە ايىنىڭ باسىندا كەلىسىم ۇزارتىلمايدى. بۇل قۇجاتتىڭ زاڭدى كۇشى توقتاتىلاتىنىن بىلدىرەدى. وسى مەرزىم وتكەننەن كەيىن ورتالىقتىڭ مولدوۆا رەسپۋبليكاسىندا قىزمەتىن زاڭدى تۇردە جالعاستىرۋعا نەگىزى بولمايدى. پوپشوي حالىقارالىق قۇقىققا سايكەس رەسەي تاراپى بۇل تالاپتاردى ساقتاۋعا مىندەتتى ەكەنىن دە اتاپ ءوتتى.
بۇعان دەيىن رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا رەسەيدىڭ كيشينەۆتەگى ەلشىلىگى مولدوۆا ءسىم-ىنەن اتالعان كەلىسىمدى توقتاتۋ نيەتى تۋرالى نوتا العانىن راستاعان بولاتىن. ونىڭ سوزىنشە، كيشينەۆتەگى «ورىس ءۇيى» 2026 جىلعى 4 شىلدەگە دەيىن جۇمىسىن جالعاستىرادى.
كيشينەۆتەگى «ورىس ءۇيىنىڭ» قىزمەتىنە قاتىستى رەسەيمەن جاسالعان كەلىسىمدى دەنونساتسيالاۋ تۋرالى شەشىمدى مولدوۆا پرەزيدەنتى مايا ساندۋ ماقۇلدادى. ەل ۇكىمەتىنىڭ حابارلاۋىنشا، كەلىسىمنەن شىعۋ ءۇشىن تاراپتاردىڭ ءبىرى ونىڭ كەلەسى بەس جىلعا اۆتوماتتى تۇردە ۇزارتىلۋىنان باس تارتۋى قاجەت. اتالعان كەلىسىم 2021 جىلعى 4 شىلدەدە كۇشىنە ەنگەن، سوندىقتان مولدوۆا ودان 2026 جىلعى 4 شىلدەدەن كەيىن رەسمي تۇردە شىعا الادى.
