قازاقستاننىڭ حالىق ءارتىسى ديماش قۇدايبەرگەن س.ج.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ "قۇرمەتتى پروفەسسورى" اتاندى. بۇل تۋرالى جوو-نىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
17 جەلتوقساندا ونەر يەسى ۋنيۆەرسيتەت ستۋدەنتتەرى مەن پروفەسسور-وقىتۋشىلار قۇرامىمەن كەزدەسكەن. كەزدەسۋ اياسىندا قازۇمۋ رەكتورى مارات شورانوۆ ديماش قۇدايبەرگەنگە مادەنيەتتى دامىتۋعا، جاستاردىڭ رۋحاني تاربيەسىنە قوسقان ۇلەسى جانە قازاقستاننىڭ حالىقارالىق ءيميدجىن ىلگەرىلەتۋدەگى ەڭبەگى ءۇشىن قازۇمۋ-دىڭ قۇرمەتتى پروفەسسورى اتاعىن تابىستاعان.
موتيۆاتسيالىق كەزدەسۋدە ديماش قۇدايبەرگەن ءوزىنىڭ ومىرلىك جانە شىعارماشىلىق جولى تۋرالى وي بولىسكەن.
«مەن ادامدى ەڭ الدىمەن رۋحاني بايلىعىمەن باعالايمىن. تالانت پەن كاسىبي قابىلەت ودان كەيىنگى نارسە. ەگەر ىشكى نەگىز بولماسا، قانداي جەتىستىككە جەتسەڭ دە، ونىڭ سالماعى سەزىلمەيدى. سىزدەر وتە قيىن ءارى جاۋاپتى جولدى تاڭدادىڭىزدار. مەديتسينا – قاتەلىكتى كەشىرمەيتىن سالا. بۇل ۇزدىكسىز ىزدەنىستى، ءوز-وزىڭە تالاپ قويا ءبىلۋدى قاجەت ەتەدى. مەنىڭشە، ناعىز جۇلدىزدار - دارىگەرلەر. ولار كۇن سايىن ادام ءومىرىن ساقتاپ قالادى»، – دەدى ءانشى.
