مەملەكەت باسشىسى قاسىم-جومارت توقاەۆ قازاقستان حالقىن تاۋەلسىزدىك كۇنىمەن قۇتتىقتاپ، ەل بىرلىگى مەن قوعامدىق تۇراقتىلىقتىڭ ماڭىزىن اتاپ ءوتتى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ ايتۋىنشا، 16 جەلتوقسان — حالقىمىزدىڭ تاريحي تاڭداۋ جاساپ، ەگەمەن ەل رەتىندە دامۋ جولىن تۇپكىلىكتى ايقىنداعان كۇنى.
"تاۋەلسىزدىك بارىنەن قىمبات. ءبىز بابالار رۋحىنا تاعزىم ەتىپ، وسكەلەڭ ۇرپاق الدىنداعى تاريحي جاۋاپكەرشىلىكتى سەزىنە وتىرىپ، وسى ۇستانىمعا ادال بولامىز", – دەدى قاسىم-جومارت توقاەۆ.
پرەزيدەنت ازاماتتاردىڭ ىنتىماعى مەن ءوزارا قولداۋىنىڭ، سونداي-اق قوعامداعى كەلىسىم مەن تۇراقتىلىقتىڭ ارقاسىندا قازاقستان تاۋەلسىزدىكتى نىعايتۋ جولىندا ەلەۋلى جەتىستىكتەرگە جەتكەنىن اتاپ ءوتتى. ونىڭ سوزىنشە، قازىرگى جاھاندىق وزگەرىستەر كەزەڭىندە ەلدىڭ بىرلىگى مەن سەنىمى ەرەكشە ماڭىزدى.
مەملەكەت باسشىسى جۇرگىزىلىپ جاتقان اۋقىمدى رەفورمالار قازاقستاننىڭ جاھاندىق بەدەلى مەن باسەكەگە قابىلەتىن ارتتىرۋعا باعىتتالعانىن ايتتى.
"ستراتەگيالىق باعدارىمىزدان اۋىتقىماي، ادىلەتتى، كۇشتى، تازا ءارى قاۋىپسىز قازاقستاندى قۇرامىز", – دەدى پرەزيدەنت.
قاسىم-جومارت توقاەۆ قازاقستاندىقتارعا باق-بەرەكە مەن تابىس تىلەپ، تاۋەلسىزدىكتىڭ ماڭگى بولۋىن تىلەدى.
قازاقستان 1991 جىلى 16 جەلتوقساندا بۇرىنعى كەڭەس ەلدەرىنىڭ ىشىندە ەڭ سوڭعىسى بولىپ، ءوز تاۋەلسىزدىگىن جاريالاعان بولاتىن.
