قىتايدا مەملەكەتتىك Huarong International قارجى كومپانياسىنىڭ بۇرىنعى باس ديرەكتورى باي تيانحۋەيگە شىعارىلعان ءولىم جازاسىنا كەسىلدى، دەپ حابارلايدى "ادىرنا" ۇلتتىق پورتالى.
بۇل تۋرالى قحر ورتالىق تەلەۆيدەنيەسى حابارلادى.
تەرگەۋ مالىمەتىنە سايكەس، باي تيانحۋەي 2014–2018 جىلدار ارالىعىندا ءتۇرلى تۇلعالارعا جوبالاردى ساتىپ الۋعا جانە كورپوراتيۆتىك قارجىلاندىرۋ الۋعا كومەكتەسكەن. ءوز قىزمەتى ءۇشىن ول جالپى كولەمى 1,108 ميلليارد يۋان (شامامەن 156 ميلليون اقش دوللارى) پارا العان.
2024 جىلعى 28 مامىردا تيانتسزين قالالىق سوتى ونى اسا ءىرى كولەمدەگى جەمقورلىق قىلمىسى ءۇشىن كىنالى دەپ تانىپ، ءولىم جازاسىنا كەسكەن. 2025 جىلدىڭ اقپان ايىندا بۇرىنعى كومپانيا باسشىسى اپەللياتسيالىق شاعىم تۇسىرگەنىمەن، تيانتسزين جوعارى حالىق سوتى العاشقى ۇكىمدى كۇشىندە قالدىردى.
سوت شەشىمىندە پارا كولەمىنىڭ «وتە ءىرى» ەكەنى جانە ونىڭ ارەكەتتەرى «اسا اۋىر سالدارعا» اكەلگەنى اتاپ ءوتىلدى. ءىس ماتەريالدارى مىندەتتى تۇردە تەكسەرۋ ءۇشىن قىتايدىڭ جوعارعى حالىق سوتىنا جولدانىپ، وندا ءولىم جازاسىن ورىنداۋ ماقۇلداندى.
سوتتىڭ تۇپكىلىكتى شەشىمىنەن كەيىن تيانتسزين ەكىنشى ارالىق حالىق سوتى ۇكىمدى زاڭ تالاپتارىنا سايكەس ورىندادى. ءمالىم بولعانداي، ۇكىم ورىندار الدىندا باي تيانحۋەيگە جاقىن تۋىستارىمەن قوشتاسۋعا مۇمكىندىك بەرىلگەن.
ايتا كەتەيىك، 2024 جىلدىڭ قاراشاسىندا قىتايدا ءىرى بانك باسشىسى دا جەمقورلىق ءۇشىن ءولىم جازاسىنا كەسىلگەن ەدى. الايدا ايىپتالۋشىنىڭ ءوز كىناسىن مويىنداپ، ۇرلانعان قارجىنىڭ ەداۋىر بولىگىن قايتارۋىنا بايلانىستى ۇكىمنىڭ ورىندالۋى كەيىنگە قالدىرىلعان.
