ايبەك سمادياروۆ قازاقستان رەسپۋبليكاسى سىرتقى ىستەر مينيسترلىگىنىڭ حالىقارالىق اقپارات كوميتەتىنىڭ توراعاسى – رەسمي وكىلى لاۋازىمىنان كەتتى. بۇل قىزمەتتە ول 8 جىل بويى جۇمىس ىستەگەن، دەپ حابارلايدى "ادىرنا" ۇلتتىق پورتالى.
قىزمەتتەن كەتۋ تۋرالى شەشىمىن سمادياروۆ مينيسترلىكتە وتكەن اپتالىق بريفينگتە حابارلادى. ول بۇل شەشىمنىڭ ءوز ەركىمەن قابىلدانعانىن، كەنەتتەن قابىلدانباعانىن ايتتى.
«مەن بۇل كۇنگە دايىندالىپ ءجۇردىم. سەگىز جىل بويى وسى مىنبەردە تۇردىم… وسى جىلدارى ەلىمىز سىرتقى ساياساتتا كوپتەگەن كەزەڭنەن ءوتتى، كوپتەگەن ماسەلە بولدى. تەك سىزدەردىڭ ارقالارىڭىزدا بۇكىل الەم قازاقستاندى تانىدى»، – دەدى ا.سمادياروۆ.
ايبەك سمادياروۆ 1983 جىلى 7 شىلدەدە وڭتۇستىك قازاقستان وبلىسىندا دۇنيەگە كەلگەن. ول II سىنىپتى توتەنشە جانە وكىلەتتى ۋاكىل ديپلوماتيالىق دارەجەگە يە، قازاق، ورىس، اعىلشىن جانە تۇرىك تىلدەرىن مەڭگەرگەن.
ەڭبەك جولىن 2005 جىلى «قازاقستانداعى قىتاي بانكى» اق-دا باستاعان ايبەك سمادياروۆ 2006 جىلدان 2008 جىلعا دەيىن قر ءسىم كونسۋلدىق قىزمەت دەپارتامەنتىندە، 2008–2010 جىلدارى ەۋروپا دەپارتامەنتىندە قىزمەت اتقاردى. 2010–2012 جىلدارى قازاقستاننىڭ ماجارستانداعى ەلشىلىگىندە جۇمىس ىستەدى. 2012–2013 جىلدارى قر پرەزيدەنتىنىڭ ءباسپاسوز قىزمەتىندە ساراپشى، 2013–2014 جىلدارى قر ءسىم سىرتقى ساياسي ساراپتاۋ مەن بولجامداۋ كوميتەتىنىڭ ءبىرىنشى حاتشىسى بولدى.
2014–2018 جىلدارى ۆەتنامداعى قر ەلشىلىگىندە ەكىنشى جانە ءبىرىنشى حاتشى، 2018–2019 جىلدارى قر ءسىم ءباسپاسوز قىزمەتىن باسقاردى. 2019–2023 جىلدارى حالىقارالىق اقپارات كوميتەتىنىڭ ورىنباسارى – ءباسپاسوز حاتشىسى لاۋازىمىندا قىزمەت اتقاردى. 2023 جىلعى ماۋسىمنان باستاپ قر ءسىم كوممۋنيكاتسيالار دەپارتامەنتىنىڭ ديرەكتورى – رەسمي وكىل بولدى.
2025 جىلدىڭ 4 ناۋرىزىندا حالىقارالىق اقپارات كوميتەتىنىڭ توراعاسى – رەسمي وكىل لاۋازىمىنا تاعايىندالعان ەدى.
