سۋ تاپشىلىعى جاعدايىندا اۋىل شارۋاشىلىعىن تۇراقتى سۋمەن قامتاماسىز ەتۋ ءۇشىن كەشەندى شارالار جۇزەگە اسىرىلماق، دەپ حابارلايدى "ادىرنا" ۇلتتىق پورتالى.
بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ مالىمدەدى.
ۇكىمەت باسشىسى وبلىس اكىمدەرىنە 2026 جىلعى ۆەگەتاتسيالىق ماۋسىمعا دايىندىق اياسىندا كوممۋنالدىق مەنشىكتەگى گيدروتەحنيكالىق نىساندار مەن يرريگاتسيالىق كانالدارعا جوندەۋ جۇمىستارىن جۇرگىزۋدى تاپسىردى. نەگىزگى مىندەت – سۋدى كوپ قاجەت ەتەتىن داقىلداردىڭ ۇلەسىن قىسقارتۋ جانە سۋ ۇنەمدەۋ تەحنولوگيالارىن كەڭىنەن ەنگىزۋ.
«اۋىل شارۋاشىلىعى مينيسترلىگى ەگىس القاپتارىن ءارتاراپتاندىرۋ جونىندە ءتيىستى كەستە بەكىتتى. بارلىق جۇمىستار وسى كەستەگە سايكەس جۇرگىزىلۋى ءتيىس. ەگەر ءبىر شارۋاشىلىق بەكىتىلگەن كورسەتكىشتەن اسىپ، ءتىپتى 1 گەكتار ارتىق ەگىس ەكسە، وعان ءبىر تامشى دا سۋ بەرىلمەيدى. مۇنداي جاعدايدا كەلگەن شىعىن بيۋدجەت ەسەبىنەن وتەلمەيدى. بۇل تالاپتى حالىققا اشىق جانە ناقتى جەتكىزۋ قاجەت»، – دەدى ولجاس بەكتەنوۆ.
سونداي-اق پرەمەر-مينيستر سۋ رەسۋرستارى جانە يرريگاتسيا مينيسترلىگىنە بەكىتىلگەن ليميتتەن تىس سۋ بەرۋ جاعدايلارىنا جول بەرمەۋدى تاپسىردى.
