جەرگىلىكتى اتقارۋشى ورگاندار ەندى حالىق ءۇشىن اۋىز سۋدىڭ باعاسىن وزدىگىنەن بەكىتەتىن بولادى. بۇل تۋرالى يندۋستريا جانە قۇرىلىس مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى باقىتجان جۇنىسبەكوۆ مالىمدەدى، دەپ حابارلايدى "ادىرنا" ۇلتتىق پورتالى.
باقىتجان جۇنىسبەكوۆتىڭ ايتۋىنشا، سۋ كودەكسىنە ەنگىزىلگەن وزگەرىستەرگە سايكەس وڭىرلىك ءماسليحاتتار ەندى اۋىز سۋدىڭ ءبىر تەكشە مەترى ءۇشىن تولەم مولشەرىن وزدەرى بەلگىلەي الادى. بۇل شەشىم كەزىندە ءوڭىردىڭ الەۋمەتتىك-ەكونوميكالىق دامۋ دەڭگەيى مەن قولدانىستاعى سۋ تاريفتەرى ەسكەرىلۋى ءتيىس.
«قازىر جەرگىلىكتى اتقارۋشى ورگاندار حالىق ءۇشىن سۋدىڭ ناقتى قۇنىن انىقتاۋ بويىنشا جۇمىس جۇرگىزىپ جاتىر»، - دەدى كوميتەت باسشىسى.
سونىمەن قاتار ول سۋدى نورمادان ارتىق تۇتىنعاندارعا قاتىستى جاڭا ەسەپتەۋ ءتارتىبىن دە ەسكە سالدى. ەگەر ادام باسىنا تاۋلىگىنە 140 ليتردەن ارتىق سۋ پايدالانىلسا، ارتىق كولەم ءۇشىن تولەم مولشەرى بەلگىلەنگەن تاريفتەن 30 پايىزعا جوعارى بولادى.
