Şymkent qalasynda omyrtqasyna bailanysty densaulyǧy syr bergen nauqas jelıden tapqan halyq emşısınıŋ kömegıne jügınıp, auyr jaraqat aldy. Būl turaly №2 qalalyq auruhanasynyŋ bas därıgerı Baqytjan Pozilov mälımdedı, dep habarlaidy “Adyrna” ūlttyq portaly “Otyrar” telearnasyna sıltep.
Bas därıgerdıŋ aituynşa, nauqas emşıge barǧannan keiın auyr halde auruhanaǧa jetkızılgen.
«Nauqastyŋ sözıne qaraǧanda, kereuetke jatqyzyp qoiyp, balǧamen ūrǧan. Saldarynan ekı aiaǧynda jansyzdanu bolǧan. Söitıp ertesıne qaita keludı sūraǧan. Bıraq sol künı keşkısın bızge jedel järdemmen jetkızıldı. Tez arada tekseru jürgızdık. Omyrtqasyn syndyryp jıbergen. Jūlynǧa da zaqym kelgen. Nauqas bızde bırneşe uaqyt jatyp, tolyqtai emdelıp şyqty. Ekı aiaǧyna jan bıttı. Üiıne şyǧaryldy», – deidı Baqytjan Pozilov.
Telearnanyŋ habarlauynşa, qazırgı taŋda nauqastyŋ jaǧdaiy jaqsy. Alaida därıgerler tūrǧyndardy mūndai jaǧdailardan saq boluǧa şaqyryp, densaulyqty tek käsıbi mamandarǧa senıp tapsyru kerektıgın eskertedı.
«Türlı osteohondrozda, bel omyrtqasy, moiyn omyrtqasy jaryqtarynda eşqandai diplomy joq mamandar ädısterdı qoldanyp jatady. Qorqynyşty ädıster. Keide ülken salmaqtaǧy kısılerdı aiaǧyndaǧy sausaǧyna bailap qoiyp, belınen ūryp jatatyn jaǧdailardy jelıden baiqaimyn. Üstınen sekırıp jatady. Moinyn qytyrlatyp jatady.
Osy mäselege qatysty pıkır bıldırgen halyq emşıler qauymdastyǧynyŋ müşesı Märiiam Dosbalaeva da omyrtqany ūryp emdeu täsılın qūptamaitynyn jetkızdı.
«Ūryp emdegen emşılerge men qosylmaimyn. Öitkenı, ol dūrys emes. Ūryp emdeu, süiektıŋ, omyrtqanyŋ qisaiuynan bolady. Ony emdeitın adamdar bolady. Är aurudyŋ öz mamany bolady. Mysaly, tıs aurudyŋ mamany, ginekolog bola almaidy. Osteohondroz degen qan jaqsy jürmegendıkten bolady. Qimyl azdyqtan bolady. Köp otyrǧannan bolady. Omyrtqany sozu kerek. Jattyǧu jasatu kerek. Bıraq bız mamany emespız. Sosyn massaj jasaimyz. Köp adamdar sertifikat alady. Qoldyŋ biotogyn tekseredı. Qūjatymyz tügel. Qūjatsyz emdeitınder bar. Anadan körıp, mynadan körıp, em bar eken dep qoldanatyn adamdar da köp», – dedı emşı.
Därıgerler men bılıktı mamandar halyqty öz densaulyǧyna beijai qaramauǧa jäne tek medisinalyq bılımı bar mamandardan ǧana keŋes aluǧa şaqyryp otyr.