Ázerbaıjanda byltyr Aqtaý mańynda apatqa ushyraǵan AZAL ushaǵynyń qurbandaryna arnalǵan eskertkish ornatyldy, dep habarlaıdy “Adyrna” ulttyq portaly QazAqparatqa siltep.
Aqparatqa sáıkes, «Hynalyg jáne Kóshpendiler joly» memlekettik tarıhı-mádenı jáne etnografııalyq qoryǵynyń aýmaǵynda ushaq apaty qurbandaryna arnalǵan memorıaldyq taqta ornatyldy. Taqtada ekıpaj músheleriniń esimderi — Igor Kshnıakın, Aleksandr Kalıanınov jáne Okıýma Alıeva, sondaı-aq qaza bolǵandardy eske alý jazbasy bar. Ázerbaıjandyq alpınıster taqtany ornatýǵa atsalysqan.
Eske salaıyq, 2024 jyly 25 jeltoqsanda Aqtaý mańynda Azerbaijan Airlines ushaǵy apatqa ushyrady. Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qaldy.
Keıin Brazılııa Áskerı-áýe kúshteriniń Áýe apattaryn zertteý ortalyǵynyń (Cenipa) mamandary AZAL áýe kompanııasynyń apatqa ushyraǵan Embraer 190 ushaǵynyń qara jáshigin taldaýǵa kiriskenin habarlaǵan bolatyn.
Bıyl 4 aqpanda Aqtaý mańyndaǵy ushaq apaty boıynsha tergeýdiń esebi jarııalandy.
