Astanada jeńil relsti kólik (LRT) jobasynyń qurylysy belsendi túrde jalǵasýda. Premer-mınıstr Oljas Bektenovke jobanyń qazirgi jaı-kúıi 112-stansa alańynda tanystyryldy, dep habarlaıdy "Adyrna" ulttyq portaly.
Úkimettiń málimetinshe, ótken jyldyń qorytyndysy boıynsha estakada, aspaly kópir men barlyq stansalardyń temirbeton konstrýkııalary tolyq aıaqtalǵan. Jobanyń qajettilikterin qamtamasyz etý maqsatynda Astanada arnaıy shpal óndirisi iske qosylyp, búginde 35 myńnan astam shpal daıyndaldy. Jalpy joba boıynsha 87,6 myń shpal qajet.
“Biz B-55 markaly beton men aldyn ala kernelgen armatýra tehnologııasyn qoldanamyz. Bul qurylymdardyń myqtylyǵyn arttyryp, aıazǵa tózimdiligin kúsheıtedi”, – delingen úkimet habarlamasynda.
Qazirgi ýaqytta qurylys alańynda relster tóselip, uzyndyǵy 2 shaqyrym bolatyn ýchaskede jáne optıkalyq talshyqty jelide jumys aıaqtalǵan. Jobada qazir 2 myńǵa jýyq adam eńbek etýde, al jaz aılarynda bul san 5 myń mamanǵa deıin jetkiziledi.
“CTS” kompanııasynyń basqarma tóraǵasy Asylbek Dúısebaevtyń aıtýynsha, bıyl qyrkúıek aıynda LRT jelisinde jolaýshysyz synaq poıyzdary iske qosylady. Joba halyqaralyq GoA4 standartyna saı júzege asyrylýda, bul 6 aılyq testileý merzimin qajet etedi.
Sapar barysynda Premer-mınıstr LRT boıyndaǵy abattandyrý josparymen de tanysty. Joba aıasynda áýejaı men Rysqulov kóshesine deıin iri aǵashtar men butalar otyrǵyzylyp, avtomatty sýarý júıesi ornatylady. Qabanbaı batyr dańǵyly men Syǵanaq kóshesine deıingi aımaqta balalar jáne sport alańdary, jaıaý júrginshiler joldary salynady. 2-temirjol vokzaly baǵytynda avtoturaqtar, velojoldar jáne kógaldandyrý júrgiziledi.
