Almaty ákimdigi qalada marqum reseılik saıasatker Vladımır Jırınovskııdiń eskertkishiniń ashylýy týraly aqparatqa qatysty pikir bildirdi, dep habarlaıdy “Adyrna” ulttyq portaly Tengrinews.kz saıtyna siltep.
Buǵan deıin reseılik BAQ Almatyda marqum Vladımır Jırınovskııge eskertkish ashylatynyn habarlaǵan bolatyn. LDPR negizin qalaýshyǵa eskertkishter 2026 jyly Reseı Federaııasynyń birneshe qalasynda ashylýy múmkin ekeni aıtylǵan.
Sonymen qatar, eske alý sharasy men saıasatkerdiń týǵan jeri Almatyda eskertkishtiń ashylýy bolatyny týraly aqparat tarady.
Almaty Mádenıet basqarmasy Tengrinews.kz saıtynyń saýalyna bergen jaýabynda Jırınovskııge eskertkish ornatý týraly ótinish túspegenin habarlady.
«Almaty qalasynyń tarıh jáne mádenıet eskertkishterin qorǵaý jónindegi komıssııasy tıisti usynysty qarastyrǵan joq», - delingen habarlamada.
Vladımır Jırınovskıı 1946 jyly 25 sáýirde Almatyda kóp balaly otbasynda dúnıege kelgen. Lomonosov atyndaǵy Máskeý memlekettik ýnıversıtetiniń shyǵys tilderi fakýltetiniń túrik tili men ádebıeti mamandyǵyn bitirgen. Sonymen birge ol marksızm-lenınızm ýnıversıtetiniń halyqaralyq qatynastar fakýltetinde oqydy.
Jırınovskıı parlamenttiń tómengi palatasy qurylǵan birinshi kúnnen bastap qaıtys bolǵan kúnge deıin Reseı Federaııasy Federaldyq Jınalysy Memlekettik Dýmasynyń segiz shaqyrylymynyń depýtaty, Memlekettik Dýmadaǵy LDPR frakııasynyń jetekshisi boldy.
Saıasatker Qazaqstanǵa qarsy málimdemelerimen este qaldy. Atap aıtqanda, 2014 jyly Jırınovskıı Qazaqstan jáne Ózbekstan, Qyrǵyzstan, Tájikstan jáne Túrkimenstan Reseıge qosylyp, onyń Ortalyq Azııa federaldy okrýgine aınalýy kerek degen edi. Osydan keıin Jırınovskııdi Qazaqstanda, Qyrǵyzstanda persona non grata dep jarııalandy.
Reseılik saıasatker 2022 jyly 6 sáýirde 76 jasynda qaıtys boldy.
