Atyraý oblysynda Taldykól aýylynyń turǵyndary jol máselesine baılanysty narazylyq bildirdi, dep habarlaıdy “Adyrna” ulttyq portaly Aq Jaıyqqa siltep.
Atyraý oblysyna qarasty Taldykól aýylynyń turǵyndary aýylǵa kireberis joldyń kúrdeli jóndeýsiz qalýyna baılanysty narazylyqqa shyqty. Aýyl halqy jol máselesi sheshilmeı kele jatqanyna 10 jyldan asqanyn aıtyp, ýáde bergen jergilikti bıliktiń áreketsizdigine narazy.
Taldykólde 1230 adam turady, olardyń kópshiligi Atyraý qalasynda jumys isteıdi. Alaıda aýylǵa kiretin 6,2 shaqyrymdyq joldyń nashar jaǵdaıy, ásirese, jańbyrly maýsym men kóktemgi qar erý kezinde turǵyndardyń qatynaýyna úlken qıyndyq týdyrady.
“On jyldan beri tek jınalys ótkizip, ýáde beredi de, keıin umytyp ketedi. Eger óz mindetterin atqara almasa, nege oryndaryn bosatpaıdy?” – deıdi turǵyndardyń biri.
2023 jyly joldy jóndeýge bıýdjetten 1 mlrd 984 mln teńge bólingen. Tamyz aıynda aýdan ákimdigi merdiger “AVS Lımıted” JShS-men kelisimshart jasap, qurylys jumystary bastalǵan. Jospar boıynsha, joldyń kúrdeli jóndeýi 2024 jyly aıaqtalýy tıis edi. Alaıda qazirgi tańda tek 500 metri ǵana salynǵan, al merdigerge jumys úshin qarajat tolyq tólengen.
Aýdan ákimdigi jobalyq-smetalyq qujattamada qatelikter ketkenin moıyndady. Sonymen qatar, 2024 jylǵy sý tasqyny saldarynan joldyń negizgi qabaty zaqymdanǵanyn alǵa tartyp otyr.
“Sý tasqynynan keıin joldyń negizi búlindi, sol sebepti qurylys jumystary ýaqytsha toqtatyldy. Qazir jobalyq-smetalyq qujattama qaıta daıyndalyp, oblystyq bıýdjet komıssııasynyń qaraýyna jiberildi. Sheshimin kútip otyrmyz”, – deıdi aýdan ákiminiń orynbasary Ashat Aımuratov.
