Atyraý oblystyq máslıhaty "Atyraý oblysynda jerleý jáne qabirlerdi kútý qaǵıdalaryn bekitý týraly" sheshiminiń jobasyn qarastyrýda. Bul qujat 2019 jyly Ulttyq ekonomıka mınıstrligi bekitken úlgilik qaǵıdalar negizinde ázirlengen. Qazirgi ýaqytta joba máslıhat depýtattarynyń qaraýyna jiberilmek, dep habarlaıdy "Adyrna" ulttyq portaly AtyrauPress-qa siltep.
Máslıhat apparatynyń basshysy Erjan Túrkistanov málimdegendeı, jańa qaǵıdalar zırattardy kútip ustaý, jerleý rásimin retteý jáne sanıtarlyq normalardy saqtaý maqsatynda ázirlengen.
Jerleý rásimine qoıylatyn negizgi talaptar bar.
Qabirler arasyndaǵy qashyqtyq keminde 1 metr, al eni jarty metr bolýy tıis. Qabirdiń tereńdigi jer bederine jáne jer asty sýlarynyń deńgeıine qaraı keminde 1,5 metr bolýy kerek. Eger qaıtys bolǵan adam asa qaýipti ınfekııadan kóz jumsa, qabir tereńdigi 2 metr bolýy shart jáne túbine 10 sm hlorly ák qabaty sebilýi tıis. Ár qabirdiń ústine 0,5 metr bıiktikte úıindi jasalyp, jaýyn-shashynnan qorǵaý úshin onyń shetteri keńeıtiledi.
Zırattardy kútip ustaý jáne abattandyrý da qaralǵan.
Zırattar rettelgen qatarlarǵa bólinip, júretin joldar qarastyrylady. Qala ákimdigi jerleýdi tirkeý jumystaryn júrgizedi. Eger qaıtys bolǵan adamnyń týystary burynǵy týys qabiriniń janyna jerleýdi qalasa, bos oryn bolǵan jaǵdaıda jáne týystyqty dáleldeıtin qujattar usynylsa, oǵan ruqsat beriledi. Týysy joq adamdardy jerleý bıýdjet qarajaty esebinen júzege asyrylady. Zırat ákimshiligi barlyq turǵyndarǵa birdeı qoljetimdi qyzmet kórsetedi.
Qujattyń maqsaty – zırattarda sanıtarlyq talaptardy saqtaý, jerleý rásimin júıeleý jáne qoǵamdyq tártipti qamtamasyz etý. Máslıhat depýtattary jobany qaraǵannan keıin, onyń naqty erejeleri bekitilýi múmkin.
