AQSh prezıdenti Donald Tramp pen Reseı prezıdenti Vladımır Pýtın Saýd Arabııasynda jeke kezdesý ótkizetin boldy, dep habarlaıdy “Adyrna” ulttyq portaly BBC-ge siltep.
Kezdesý barysynda Reseı men Ýkraına arasyndaǵy soǵysty toqtatý múmkindikterin talqylaıdy. Bul týraly Tramp 12 aqpanda Aq úıde jýrnalısterge bergen suhbatynda málimdedi. Mundaı sheshim Pýtınmen telefon arqyly sóıleskennen keıin qabyldanǵan.
"Biz mıllıondaǵan adamnyń qaza bolýyn toqtatqymyz keledi", – dedi Tramp. Sonymen qatar, ol Ýkraınaǵa barlyq jerlerin qaıtarý múmkindigi "az yqtımal" ekenin málimdedi jáne Ýkraınanyń NATO-ǵa kirýiniń “tıimdi emes” ekenin atap ótti.
Pýtınmen telefon arqyly sóıleskennen keıin Tramp Ýkraına prezıdenti Vladımır Zelenskııge habarlasyp, bolǵan áńgimeniń mán-jaıyn jetkizgenin aıtty.
“Men AQSh memlekettik hatshysy Marko Rýbıo, RÝ dırektory Djon Retklıff, ulttyq qaýipsizdik jónindegi keńesshi Maıkl Ýolt jáne arnaıy ókil Stıv Ýıtkoffty kelissózderdi júrgizýge taǵaıyndadym. Men bul kelissózderdiń sátti bolatynyna senimdimin”, – dedi Tramp.
Kremldiń baspasóz hatshysy Dmıtrıı Peskov eki el basshylary “Reseı-Ýkraına soǵysyn retteý úshin kelissózder júrgizý kerektigi” týraly keliskenin rastady. Onyń aıtýynsha, Pýtın “qaqtyǵystyń negizgi sebepterin joıý qajettigin” aıtyp ótken. Sonymen qatar, Reseı prezıdenti Trampty Máskeýge resmı saparmen kelýge shaqyrǵan.
Tramp pen Pýtınniń kezdesýi Ýkraınadaǵy soǵysty toqtatý joldaryn qarastyrýy múmkin eń iri kelissózderdiń biri bolýy múmkin.
