Almaty garnızonynyń áskerı soty 2022 jylǵy Qańtar oqıǵasy kezinde arheolog Erlan Jaǵyparov pen Áýez Qapsalanovtyń ólimine kináli dep tanylǵan Ulttyq ulannyń burynǵy podpolkovnıgine úkim shyǵardy, dep habarlaıdy “Adyrna” ulttyq portaly.
Sot otyrysy jabyq rejımde ótti. Áskerı qyzmetkerge Qylmystyq kodekstiń 451-baby 2-bóliginiń 1) tarmaǵy "Aýyr zardaptarǵa ákep soqtyrǵan qarýdy qoldana otyryp, bılikti asyra paıdalaný" boıynsha is qaraldy.
"Sottalýshy bılik ókili bola otyryp, óz quqyqtary men ókilettikterinen tys áreketter jasady. Saldarynan aýyr zardaptar - eki jábirlenýshiniń ólimine alyp keldi", - dep jazdy áskerı sot.
Sottalýshy kinásin moıyndamady.
"Sot sheshimimen sottalýshy 7 jylǵa bas bostandyǵynan aıyryldy. Ol áskerı ataǵynan da aıyryldy. Jábirlenýshiniń paıdasyna 20 mln teńge moraldyq zalal óndirildi", - deıdi Almaty qalalyq áskerı soty.
Sot úkimi zańdy kúshine engen joq.
Eske sala keteıik, Erlan Jaǵyparov – arheolog, tarıhı-mádenı murany zertteýshi bolǵan. Qańtar oqıǵasy kezinde joǵalyp ketip, birneshe kúnnen keıin máıithanadan tabyldy. Marqumnyń denesinde azaptaý izderi men oq jaraqaty bolǵan.
