Qazaqstan Prezıdenti Qasym-Jomart Toqaevtyń tóraǵalyǵymen úkimettiń keńeıtilgen otyrysy bastaldy, dep habarlaıdy “Adyrna” ulttyq portaly.
Aqorda málimetinshe, otyrysta elimizdiń 2024 jylǵy áleýmettik-ekonomıkalyq damýynyń qorytyndylary shyǵarylyp, úkimettiń aldaǵy kezeńge arnalǵan negizgi mindetteri belgilenedi.
Byltyrǵy jumystyń qorytyndysyn premer-mınıstr Oljas Bektenov, Ulttyq bank tóraǵasy Tımýr Súleımenov jáne birqatar óńirdiń ákimderi baıandaıdy dep josparlanǵan.
"Búgin biz Úkimettiń keńeıtilgen otyrysynda óte ózekti máselelerge toqtalamyz. Sebep – bárimizge belgili. Qazir dúnıe júzi túbegeıli ózgeriske ushyrap jatyr. Jahandyq úderister, eń aldymen, elimizdiń ekonomıkalyq ahýalyna áserin tıgizetini anyq. Jappaı ıfrlandyrý dáýiri, ıaǵnı jańa tehnologııalyq kezeń bastaldy. Kúlli álem múldem basqa jaǵdaıda ómir súredi. Biz soǵan mindetti túrde daıyn bolýymyz kerek. Jańa tehnologııalyq ahýalǵa saqadaı saı turýymyz qajet. Bul – elimizdiń básekege qabiletin arttyryp, turaqty damýyna jol ashatyn asa mańyzdy faktor", - dedi Toqaev.
Prezıdenttiń aıtýynsha, úkimet pen ákimderdiń jumysy qanshalyqty tıimdi ekeni aldymen ekonomıkanyń damý kórsetkishteri men azamattardyń turmys sapasyna qaraı baǵalanady.
Kún tártibine sáıkes, jıynda premer-mınıstr Oljas Bektenov, premer-mınıstrdiń orynbasary Serik Jumanǵarın, Ulttyq bank tóraǵasy Tımýr Súleımenov, "Samuryq-Qazyna" AQ basqarma tóraǵasy Nurlan Jaqypov, Astana qalasynyń ákimi Jeńis Qasymbek, Shymkent qalasynyń basshysy Ǵabıt Syzdyqbekov, Qyzylorda oblysynyń ákimi Nurlybek Nálibaev baıandama jasaıdy.
