Qazaqstandaǵy fýtbol jáne hokkeı klýbtaryna bólingen qarjy tıimsiz paıdalanylǵan, dep habarlaıdy “Adyrna” ulttyq portaly.
Sońǵy alty jylda qazaqstandyq 18 fýtbol klýbyna memlekettik bıýdjetten 200 mıllıardtan astam qarajat bólingen. Bul týraly Qazaqstan Respýblıkasynyń Sybaılas jemqorlyqqa qarsy is-qımyl agenttigi málimdedi.
Agenttik tóraǵasynyń orynbasary Ulan Sarqulov májilis kýlýarynda sportqa bólingen qarajattyń basym bóligi sheteldik legıonerlerdiń jalaqylaryna jáne tıimsiz shyǵyndarǵa jumsalǵanyn aıtty.
“200 mıllıard teńgeden asa qarjynyń negizgi bóligi sheteldik sportshylarǵa jalaqy tóleýge ketip, sporttyq ınfraqurylymdy damytýǵa kóńil bólinbegen. Sońǵy alty jylda bar bolǵany eki jańa stadıon salyndy, al kóp klýbtardyń ınfraqurylymy múlde nashar jaǵdaıda”, – dedi Sarqulov.
Atap aıtqanda, “Astana” fýtbol klýbyna 50 mıllıard teńge bólingenimen, klýbtyń jeke bazasy joq. Sonymen qatar, qarjynyń 60-70%-y birneshe maýsym ǵana oınaǵan legıonerlerdiń jalaqysyna ketkeni belgili boldy.
Osyǵan uqsas jaǵdaı “Barys” hokkeı klýbynda da baıqalǵan. Alty jyl ishinde klýbqa shamamen 49 mıllıard teńge bólingen, onyń kóp bóligi sheteldik oıynshylardyń jalaqysyna jumsalǵan. Alaıda klýbtyń sońǵy jyldardaǵy nátıjeleri bólingen qarjyǵa sáıkes kelmeıdi.
“Bul qarajatty sporttyq ınfraqurylymdy jaqsartýǵa nemese balalar men jastar sportyn damytýǵa jumsaǵan áldeqaıda tıimdi bolar edi. Bolashaqta kásibı sportshylar dál osy jas urpaq arasynan shyǵatyny belgili”, – dep tolyqtyrdy Sarqulov.
Sonymen birge, agenttik Mádenıet jáne sport mınıstrligine sportqa bólinetin qarajatty utymdy paıdalaný boıynsha usynystar bergenin habarlady.
