Atyraýda mektep muǵalimi sýııd jasamaq bolǵan, dep habarlaıdy “Adyrna” ulttyq portaly Orda.kz-ke silteme jasap.
№37 orta mekteptiń aǵylshyn tili páni muǵalimi pedkeńeste dırektor men áriptesi tarapynan qorlanǵanyn habarlaǵan.
Orda.kz-tiń málimetinshe, keńes barysynda qazaq tili pániniń muǵalimi aǵylshyn tili pániniń muǵalimi Muratovany alaıaqtyq jasady dep aıyptaǵan. Bir er adam kelip, Muratova týraly áshkereleıtin aqparat jetkizgen. Jábirlenýshiniń áriptesteri ony qorǵaýǵa tyrysyp, áńgimeni toqtatýdy talap etken kórinedi. Degenmen mektep dırektory tekserýdi jalǵastyrýǵa múmkindik berip, jaǵdaıdy toqtatpaǵan.
«Ol meni pedkeńes barysynda qorlady. Osydan keıin shydaı almadym. Buǵan deıin mektep dırektory maǵan "qoly óte uzyn" dep aıtqan bolatyn. Bul men úshin qatty qorlaý boldy, basqa amal tappadym. Áriptesterim meni qoldady, biraq dırektor keńesti aıaqtaýdan bas tartty», — dep bólisti Sandýǵash Muratova Orda.kz tilshisine.
”Qorlandym” degen ustaz pedkeńeste oqýshylardyń tártibi men úlgerimin talqylaý josparlanǵanyn aıtqan.
«Olar meni bireýden aqsha alyp, qaıtarmady dep aıyptady. Eger men zań buzǵan bolsam, quqyq qorǵaý organdaryna júginý qajet edi, pedkeńeste máseleni qaraýdyń qajeti joq edi. Dırektor ádeıi basqa muǵalimge men týraly osyndaı sózder aıtqyzdy. Barlyq kinálilerdi, sonyń ishinde dırektordy da jaýapkershilikke tartýdy talap etemin», — dep qosty Muratova.
Pedkeńesten keıin shamamen 20:00-de muǵalim ózin-ózi óltirýge árekettengen. Qazirgi ýaqytta ol aýrýhanada em alyp jatyr.
