Memleket basshysynyń Jarlyǵymen 2025 jyl Jumysshy mamandyqtar jyly dep jarııalandy. Osyǵan oraı Abaı oblysynda 300-ge jýyq is-sharany qamtıtyn aımaqtyq jospar bekitildi. Ol bıylǵy jyldy eńbek pen kásip merekesi retinde belgilep, oblystyń barlyq qalalary men aýdandaryn qamtymaq. Abaı oblysynda barlyǵy 33 kolledj bar, onda 21 myńnan astam stýdent bilim alýda. 2024-2025 jańa oqý jylynda oqýǵa qabyldanǵandar sany 5 900 adamdy qurasa, olardyń 2 000-y jumysshy mamandyqty tańdaǵan. Búginde oblystaǵy 21 kolledjde 5 444 stýdent jumysshy mamandyǵy boıynsha bilim alýda.
Oqytýdyń tanymal baǵyttaryna mynalar jatady: elektr jáne gaz dánekerleýshileri, elektrshi, santehnıkter, qurylysshylar, aspazdar, tiginshiler, shashtarazdar, sonymen qatar ıfrlyq tehnologııalar salasyndaǵy mamandar. Bul mamandyqtarǵa qyzyǵýshylyq jyl saıyn artyp, jumysshylarǵa degen suranystyń rastaıdy.
Oblystaǵy 31 kolledjde stýdentterge kásiporyndarda teorııany praktıkamen ushtastyrýǵa múmkindik beretin dýaldy oqytý júıesi engizilgen. Osy júıe aıasynda 70 mamandyqta 3 060 stýdent bilim alýda. Sondaı-aq 20 kolledj 22 kásiporynmen memorandýmǵa otyrdy, sonyń arqasynda 4 200 stýdent jumys berýshilerdiń demeýshiligimen oqýǵa múmkindik aldy.
Bıyldyń ózinde oblystaǵy kolledjderde slesarlar, tokarlar, elektrshiler men merchendaızerlerdi qosa alǵanda, jańa mamandyqtar ashý josparlanýda.
Búginde joǵary synyp oqýshylaryna arnalǵan bilim berý baǵdarlamalary pılottyq rejımde júzege asyrylýda. Jalpy bilim beretin mektepterdiń 10-11 synyp oqýshylary bir mezgilde kolledj dıplomyn ala alady. Ótken oqý jylynda jobaǵa eki oqý orny qosyldy: Joǵary geodezııa, kartografııa jáne qurylys kolledji men Bıznes jáne servıs kolledji. 2024-2025 jyldary Kólik kolledji men Besqaraǵaı kolledjinde eksperımenttik toptar ashyldy.
Sonymen qatar, Abaı oblysyndaǵy kolledj stýdentteri WorldSkills chempıonattarynda dástúrli túrde jetekshi oryndardy ıelenedi. Oblys quramasy eki jyl qatarynan el birinshiliginde úzdik bolyp keledi.
