Aqtaýdaǵy ata-analar orys tilinde oqytatyn bastaýysh synyptardyń ashylmaýyna baılanysty alańdaýshylyq bildirýde, dep habarlaıdy “Adyrna” ulttyq portaly Lada.kz-ke siltep.
Bala bilimi úshin dabyl qaqqan ata-analar qalalyq bilim bólimi №31 mektepte orys tilinde oqytatyn bastaýysh synyptar ashylady dep ýáde bergenin aıtady. Alaıda mundaı synyptar áli ashylmaǵan.
Jańa mekteptiń qurylysy kezinde onyń qazaq jáne orys tilderinde oqytylatyny týraly aqparat bilim bólimi men oqý ornynyń Instagram paraqshasynda jarııalanǵan. Aqtaýdaǵy 17, 19 jáne 33 yqshamaýdandardaǵy jańa mektepterge oqýǵa túsý úshin qujattardy qabyldaý 6 qańtarda bastalǵan.
Ótken aptada ata-analar bilim bólimi orys tilinde oqytatyn synyptardy ashamyz dep ýáde bergenin aıtty. Orys bólimi bolady dep kútken 200 bastaýysh synyp oqýshysynyń ata-anasy mektepke qujat tapsyrmaq bolǵanda, mektep qujattardy qabyldamaǵan. Mektepte qabyldaýǵa qatysty barlyq suraqtar qalalyq bilim basqarmasynda qaralyp jatqany týraly habarlama ilingen.
“Bul bizdiń balalarymyzdyń quqyqtarynyń buzylýy. Olardyń qazaqsha oqıtyndardan qandaı aıyrmashylyǵy bar? Olardyń da osy shaǵyn aýdanda turýǵa tolyq quqyǵy bar. Orys tilinde oqytatyn 1-7 synyptar arasynda eń bolmaǵanda bir synyptan uıymdastyrsyn”, - deıdi ata-analar.
Qalalyq bilim basqarmasy arnaıy komıssııa quryp, orys tilinde oqytatyn synyptardy ashpaý týraly sheshim shyǵarǵany anyqtaldy. Birinshiden, munda kadr tapshylyǵy bar. Ekinshiden, mektepte oryn jetkiliksizdigi sebep bolǵan. Mekteptiń syıymdylyǵy 900 oryndyq qana, al balalardy memlekettik tilde oqýǵa qabyldaýǵa 1500 ótinish túsken. Osyǵan baılanysty sheneýnikter ata-analarǵa kómek kórsete almaıtyndaryn jetkizdi.
Ata-analar quqyqtaryn sotta qorǵaýǵa daıyn ekenderin bildirip, bilim basqarmasynyń basshylyǵyna júginýdi josparlap otyr.
