25 jeltoqsanda Aqtaý áýejaıy mańynda oryn alǵan Ázerbaıjannyń AZAL áýe kompanııasyna tıesili Embraer E190AR ushaǵynyń apaty áli de qoǵam nazarynda. Apattan aman qalǵan jolaýshy Sýbhonkýl Rahımovtyń oqıǵa týraly aıtty, dep habarlaıdy "Adyrna" ulttyq portaly Anadolyǵa siltep.
Reseıde turatyn tájikstandyq Sýbhonkýl Rahımov apat kezinde ushaq bortynda bolǵan. Ol alǵashqy jarylysty estigennen keıin jaǵdaıdyń kúrdelene bastaǵanyn baıqaǵanyn jetkizdi.
"Men uıyqtap jatqan edim. Ushaqtyń joǵary kóterilip bara jatqanyn sezip, jan-jaǵyma qaradym. Biraq qatty tumannan eshteńe kórinbedi. Bir sátte ushaq qatty silkinip, maskalar túsirildi", – dedi Rahımov.
Jolaýshynyń aıtýynsha, ushaq apat aldynda teńizdiń ústinen ushqan. Ekinshi jarylystan keıin ushaq túsiniksiz áreket jasaı bastaǵan. Rahımov ushaq qulaǵan sátte esin joǵaltqanyn, biraq ekıpajdyń kásibı áreketteri jolaýshylardy sabyrǵa shaqyrýǵa kómekteskenin atap ótti.
"Bortserik ázirbaıjan tilinde sóılep, bizdi sabyrǵa shaqyrdy. Ol sońǵy sátke deıin óz mindetin atqardy. Bul biz úshin úlken qoldaý boldy", – dedi ol.
Aqtaýdaǵy apat kezinde 67 adam bortta bolǵan. Onyń 38-i qaza tapsa, 29 adam aman qalǵan.
