Almatynyń Shuǵyla aýdanynda qazaqstandyq taı boksynan álem chempıony Álı Serik pyshaq jaraqatynan kóz jumdy. Qylmysqa marqumnyń synyptasy kúdikti retinde qamaýǵa alyndy, dep habarlaıdy "Adyrna" ulttyq portaly.
Marqumnyń jaqyndary bul oqıǵaǵa tergeýdiń ádil júrgizilip, kinálige qatań jaza taǵaıyndalýyn talap etip otyr.
Marqumnyń anasy Aqmaral Tabysbekqyzynyń aıtýynsha, kúdikti Álımen birge 11 jyl bir synypta oqyǵan jáne olardyń arasynda eshqandaı dushpandyq baıqalmaǵan.
“Ol Álımen birge aýyzasharǵa qatysyp, otbasymyzǵa kómektesip júrgen bala edi. Biraq sol kúni janjal shyǵyp, júrek tusynan tórt ret pyshaqtap, moınynan jaraqat saldy. Qolynda eki pyshaǵy bolǵan”, – dedi anasy.
Marqumnyń bapkeri Ramıs Ǵabıtov Álıdiń álem chempıony atanǵan eń jas sportshy bolǵanyn atap ótti.
“Biz odan úlken úmit kúttik. Ol jastarǵa úlgi bolatyn. Keler jyly eresekter arasyndaǵy Qazaqstan chempıonatyna qatysýy kerek edi. Álı sol dodany jeńip, Azııa chempıonatynda óner kórsetýdi jáne kásibı sportqa ótýdi josparlaǵan edi,” – dedi bapker.
Almaty qalasy polıııa departamentiniń resmı ókili Saltanat Ázirbektiń málimdeýinshe, kúdikti “aradaǵy janjal saldarynan pyshaq jaraqatyn saldym” dep túsinikteme bergen.
“Qylmystyq is júrgizý kodeksiniń 128-babyna sáıkes, ol qamaýǵa alyndy. Qylmystyń basqa da mán-jaıy anyqtalyp jatyr,” – dedi Saltanat Ázirbek.
Jantúrshigerlik jaǵdaıǵa kýá bolǵandardyń aıtýynsha, Álı pyshaq jaraqatynan keıin qansyrap, jaqyn mańdaǵy orynǵa qulaǵan.
“Eki jigit qashty, al bir jigit artynan qýdy. Álı tiri jatqan, biraq kóz aldymda jan tapsyrdy,” – dedi kýáger Serik Raqyshev.
Qaıǵyly oqıǵa búkil eldi dúr silkindirdi. Jaqyndary men qoǵam ókilderi tergeýdiń ádil júrgizilýin talap etýde. Marqumnyń otbasy bul qaıǵyly oqıǵaǵa kináli adamnyń ádil jazalanýyn suraıdy.
