AQSh-tyń vıe-prezıdenti Kamala Harrıstiń balalarǵa arnalǵan «Superheroes Are Everywhere» kitabynyń qazaq tiline aýdarylǵan nusqasy «Atamura» baspasynda jaryq kórdi.
«Sýperqaharmandar aramyzda» atty kitaptyń tusaýkeseri Jambyl atyndaǵy jasóspirimder kitaphanasynda ótti. Sharaǵa arnaıy shetelden kelgen qonaqtar, jýrnalıster, oqýshylar men olardyń ustazdary jınaldy. Qazaq tiline aýdarylǵan kitapty alǵash ret kópshilikke usynǵan «Atamura» baspasy balalar ádebıetine erekshe kóńil bólip, sheteldik áriptesterimen birlese jumys istep keledi.
2019 jyly alǵash jaryq kórgen bul kitap Kamala Harrıstiń ata-anasynan alǵan tálim-tárbıesin, otbasylyq qundylyqtaryn baıandap, oqyrmandaryna jaqyn ortadan alynǵan kúsh-qýat pen senimniń mańyzdylyǵyn kórsetedi. Kitapta ata-analar men balalar arasyndaǵy qarym-qatynastyń máni men qoǵamnyń balany tulǵa retinde qalyptastyrýdaǵy róli keńinen túsindirilgen.
Kitapty qazaq tiline aýdarǵan Jazıra Qul-Muhammed onyń túpnusqasyndaǵy ıdeıalar men mazmundy ulttyq tanymǵa saı beıimdep usynǵanyn aıtty. Bul eńbekti baspa balalar men olardyń ata-analary qyzyǵa oqıdy dep senedi.
Tusaýkeser barysynda «Atamura» korporaııasynyń prezıdenti Raqymǵalı Qul-Muhammed kitaptyń negizgi mazmunyn túsindirip, qaharmandyqtyń shynaıy mánin aıqyndady.
«Avtor "qaharman degen kim? qaharman bolý úshin ne isteý kerek?", soǵan jaýap beredi. Mysal úshin qaharman bolý úshin úlken bıiktikti baǵyndyrmaı-aq, ózińniń dosyńa qamqor bolyp nemese bir úlken ıgi bastamalardy bastap, halyqtyń ıgiligine jaraıtyn isti isteseń batyl bolsań, tipti ustazdyń ózi boıyndaǵy barlyq bilimin jastarǵa beretin bolsa ol da qaharman bolyp sanalady. Sol týraly aıtady, túsindiredi», – dedi ol.
Shara sońynda «Atamura» baspasy kishkentaı qonaqtarǵa «Tańǵajaıyp globýs» atty arnaıy basyp shyǵarǵan kitaptardy syıǵa tartyp, estelik sýretke tústi. Balalar men olardyń ustazdary kitaptyń mazmunyna qyzyǵýshylyq tanytyp, aýdarmashy Jazıra Qul-Muhammedke alǵystaryn bildirdi.
Jýrnalıst Eseı Jeńisuly da kitaptyń qoǵamǵa tıgizer áseri týraly pikir bildirdi.
«Atamura» baspanasynan shyqqan "Sýperqaharmandar aramyzda" kitaby balalar úshin, ásirese, bastaýysh synyptaǵy balalar úshin asa qundy. Shyn máninde ata-anamyzdy, týystarymyzdy, ósken ortamyzdy, ustazymyzdy, ýnıversıtettegi birge oqyǵan kýrstastarymyzdy, ár jyldary jumys istegen azamattardy qadirleı aldyq pa? Olardyń boıynan sýper qaharmanǵa tán qasıetti baıqaı aldyq pa, izdedik pe? Álde olardyń tek teris qasıetterin kórdik pe? Shyndyǵyna kelgende, bul kitap bizdiń álemge degen kózqarasymyzdyń qısyqtaý qalyptasqanyn moıyndatady», – dedi.
Sharaǵa kelgen balalar kitaptyń dızaıny men mazmunyn qyzyqtap, kitap týraly pikir bildirdi.
«Maǵan kitap unady. Sýretteri de óte erekshe. Men bos ýaqytymda kitap oqyǵandy qatty jaqsy kóremin. Aldaǵy demalysta osy kitapty alyp, oqıtyn bolamyn», - dedi kishkentaı oqyrman Ásel.
«Sýperqaharmandar aramyzda» kitaby – qazaq tiline aýdarylǵan álemdik deńgeıdegi sapaly týyndylardyń biri. Balalar men jasóspirimderdi tárbıeleý men olarǵa durys baǵyt kórsetýge arnalǵan mundaı eńbekterdiń kóptep jaryq kórýi ulttyq ádebıetke qosylǵan qomaqty úles bolyp tabylady.
Symbat Naýhan
«Adyrna» ulttyq portaly
