Atyraýda ata-analar «Sarmat» mamandandyrylǵan áskerı mektebinde oqýshylarǵa qatysty zorlyq-zombylyq bolǵanyn aıtyp, dabyl qaqty, dep habarlaıdy "Adyrna" ulttyq portaly "Aq Jaıyq" basylymyna siltep.
"Aq Jaıyq" dereginshe, mektep tárbıelenýshileri muǵalimderdiń birneshe ret uryp-soǵyp, elektroshoker qoldanǵandaryn aıtady. Tipti pyshaqpen qorqytqan kórinedi.
Bul týraly áleýmettik jelide zardap shekken oqýshylardyń biriniń anasy Nurgúl Espýsınova baıandady.
«Balamnyń denesindegi jaraqattardy kórip, mektepke jaǵdaıdy anyqtaýǵa bardym. Biraq sol kezde mektep dırektory da, muǵalimder de ornynda bolmady. Keıinirek balamnyń mektepten shyǵarylǵanyn bildim», – deıdi ol.
Nurgúl Espýsınova balasy qazan aıynan bastap mektepke barǵysy kelmeıtinin aıtyp, uly bilim ordasynda qalýdan úzildi-kesildi bas tartqanyn aıtady.
«Mektep ákimshiligi ulymnyń nasybaı qoldanǵanyn aıtyp, ony mektepten shyǵarǵan. Alaıda bul jaǵdaıdy dáleldeıtin eshqandaı kýágerler joq. Paket ulymnyń sómkesinen tabyldy dep aıtylǵanymen, ol týraly men eshteńe bilmeımin. Qaıta tekseris nátıjesinde ulymnyń denesinde eshqandaı zııandy zattardyń izi tabylǵan joq. Soǵan qaramastan, ony mektepten shyǵardy. Ulymnyń keýdesin elektroshokermen uryp, pyshaqpen qorqytqan. Tipti ınemen shanshyǵan kezderi bolǵan. Ulymnyń denesinde pyshaq izderi bar», – deıdi anasy.
Oqýshyny mektepten shyǵarǵan. Jaǵdaıǵa qatysty Atyraý oblystyq bilim basqarmasy pikir bildirdi. Basqarma oqýshynyń tártip buzýshylyqtaryn birneshe ret qaıtalaǵanyn jáne osynyń saldarynan mektepten shyǵarylǵanyn habarlady.
«Oqýshy qyrkúıek aıynda birneshe tártip buzýshylyq jasaǵan. Oǵan eskertý berildi. Jeltoqsanda bul jaǵdaı qaıta qaıtalanǵan soń, pedagogıkalyq keńes sheshimimen oqýshy mektepten shyǵaryldy», – delingen bilim basqarmasynyń málimdemesinde.
Qazirgi ýaqytta ata-analardyń shaǵymy boıynsha tergeý amaldary júrip jatyr.
