Pavlodar men Omby oblystarynyń shekarasynda AN-2T tıelgen MAZ kóligi ustaldy, dep "Adyrna" ulttyq portaly QazTAG-qa siltep.
Pavlodar oblysy boıynsha memlekettik kirister departamentiniń qyzmetkerleri Ulttyq qaýipsizdik komıtetiniń shekara qyzmetimen birlesip, AN-2T áýe kemesin tasymaldaý faktisin anyqtady. Bul týraly Pavlodar oblysy memlekettik kirister departamentiniń eksporttyq baqylaý bólimi basshysy Maqsut Qantarbaev senbi kúni málimdedi.
«Amangeldi» avtokólik ótkizý pýnktinde («RF Omby oblysynyń shekarasy») «MAZ 54323» markaly kólikti tekserý barysynda salmaǵy 3 tonna 600 kg bolatyn AN-2T ushaǵy tasymaldanyp jatqany anyqtaldy. Onyń baǵalaý quny – 1 800 000 reseı rýbli», – dedi Qantarbaev.
Ushaqty azamat M. aýkıonnan jeke maqsatta satyp alǵan. Alaıda shekaradan ótken sátte azamat M.-niń arnaıy taýarlardy sáıkestendirý týraly qorytyndysy bolmaǵan. Bul qujat belgili bir taýardyń azamattyq nemese áskerı maqsatta qoldanylatynyn anyqtaý úshin qajet.
Pavlodar oblysy Ertis aýdandyq sotynyń qaýlysymen azamat M. Ákimshilik quqyqbuzýshylyq týraly kodekstiń 463-babynyń 1-bóligi boıynsha kináli dep tanylyp, oǵan 50 myń teńgeden astam kóleminde aıyppul salyndy.
