Reseı prezıdenti Vladımır Pýtın jyldyq esep berý kezinde eńbek mıgranttary týraly pikirin bildirip, bul máselege júıeli túrde qaraý kerektigin atap ótti, dep habarlaıdy “Adyrna” ulttyq portaly.
Ol bir jaǵynan biliktiligi joq jumystarǵa qajettilikti azaıtý kerek ekenin aıtsa, ekinshi jaǵynan, Reseıge jumys izdep kelgen mıgranttardy aldyn ala daıyndaý mańyzdy ekenin málimdedi.
"Ortalyq Azııa elderinde orys mektepteriniń jelisin ashyp, bolashaq mıgranttardy Reseıdiń mádenıetimen, qundylyqtarymen jáne zańdarymen tanystyrý qajet. Sonymen qatar, elde júrgen sheteldikterge qoıylatyn talaptardy kúsheıtý kerek," — dedi Pýtın.
Prezıdent bul baǵyttaǵy sharalardyń biri retinde orys tilin bilmeıtin balalardy mektepke qabyldamaýǵa múmkindik beretin zańdy mysalǵa keltirdi. Onyń aıtýynsha, bul mıgranttardyń qoǵamǵa sátti beıimdelýine yqpal etedi.
Osyǵan baılanysty Reseı men Qazaqstan arasynda úsh óńirde jańa orys mektepterin ashý týraly kelisim jasalǵany belgili boldy. Túrkistan, Taraz jáne Qyzylorda qalalarynda salynatyn bul mektepterdiń qurylysy jóninde Qazaqstannyń Bilim mınıstrligi naqty aqparat usyndy.
Jýrnalısterdiń suraǵyna jaýap bergen mınıstrlik bul mektepterdiń qarjylandyrý kózderi boıynsha talqylaýlar júrip jatqanyn aıtty. Qazaqstanda mundaı bilim ordalarynyń ashylýy qoǵamda ártúrli pikirler týdyrýda, al sarapshylar olardyń uzaq merzimdi áserin talqylap jatyr.
