Aýǵanstannan kelgen 23 jastaǵy Sodaba Attar óziniń týǵan eline oralýǵa májbúr bolýdan qaýiptenip, Qazaqstannan bosqyn mártebesin suraǵanymen, ótinishi qanaǵattandyrylmady, dep habarlaıdy "Adyrna" ulttyq portaly Stan.kz-ke siltep.
Qazaqstan soty onyń ótinishin qabyldamaý týraly sheshim shyǵardy.
Sodaba Attar Aýǵanstanda Talıban bılikke kelmeı turyp, qyzdarǵa bilim berý jáne halyqaralyq uıymdarmen jumys isteý salasynda qyzmet atqarǵan. 2023 jyldyń shildesinde onyń ákesine tálipterden hat kelgen, onda qyzǵa "ólim nemese májbúrli neke" kútip turǵany habarlanǵan. Bul Sodabany elinen qashýǵa májbúr etti.
2022 jyly Iran arqyly Qazaqstanǵa kelip, bilim alý vızasymen Almatydaǵy ýnıversıtetke grantqa túsken. Alaıda oqýyn jalǵastyra almaýy sebebinen vızasynyń kúshi joıylyp, ol zańdy mártebesinen aıyryldy. Qazaqstan bıligine bosqyn mártebesin surap júgingenimen, onyń ótinishi dálelderdiń túpnusqasyn usynbaǵandyqtan qabyldanbady.
Sot Sodaba Attardyń usynylǵan qujattarynyń túpnusqalyǵyn tekserý múmkin emestigin alǵa tartty. Sýdıa Almıra Rahymjanova Sodabanyń talaptaryn qanaǵattandyrýdan bas tartty. Sonymen qatar, aýǵan bıliginiń oǵan shetelge shyǵýǵa múmkindik bergenin eskere otyryp, otanyna oralýǵa negizsiz qorqynysh bar dep eseptedi.
Sodaba Attar sot sheshimine shaǵym túsirýdi josparlap otyr. Onyń aıtýynsha, qujattardy tálipterdiń qolyna túsirý qaýpi ony túpnusqalardy usynýdan bas tartýǵa májbúrlegen.
Sodaba Attardyń taǵdyryna qatysty sońǵy sheshim áli belgisiz. Ol óziniń qaýipsizdigi úshin kúresin jalǵastyrýda.
