AQSh prezıdenti Donald Tramp Ýkraınanyń Reseı aýmaǵy túkpirine AQSh zymyrandarymen soqqy jasaýyna qarsy ekenin aıtty. Bul týraly ol 12 jeltoqsan, beısenbide jarııalanǵan Time jýrnalyna basylymnyń nusqasy boıynsha «jyl adamy» dep tanylýyna baılanysty bergen suhbatynda málimdedi, jep habarlaıdy “Adyrna” ulttyq portaly.
«Men Reseıge júzdegen mıl tereńdikke zymyrandar ushyrýǵa úzildi-kesildi qarsy ekenimdi aıtamyn. Nege biz buny jasap jatyrmyz? Biz tek bul soǵysty qozdyryp, jaǵdaıdy aýyrlatamyz», – dep keltiredi basylym Tramptyń sózderin.
“Ýkraınaǵa qoldaý kórsetýdi toqtata ma” degen suraqqa saılanǵan prezıdent AQSh kómegin Reseımen atysty toqtatý týraly kelissózderde qysym jasaý quraly retinde paıdalanatynyn aıtty.
«Men kelisimge qol jetkizgim keledi, al munyń jalǵyz joly – Kıїvti qoldaýdan bas tartpaý», – dedi ol.
Saılaýaldy naýqany kezinde Tramp Reseı men Ýkraına arasyndaǵy soǵysty «24 saǵatta aıaqtaýǵa» ýáde bergen edi. Alaıda jýrnalıstermen áńgimesinde saıasatker beıbitshilik ornatý ońaı bolmaıtynyn moıyndady.
«Taıaý Shyǵystaǵy máselelerdi sheshý áldeqaıda ońaı, al Reseı men Ýkraına arasyndaǵy jaǵdaı áldeqaıda kúrdeli. Jastardyń máıitteriniń dalalarǵa shashylyp jatqanyn kórý tańǵaldyrady. Bul – aqylǵa syımaıtyn nárse», – dep atap ótti Tramp.
Qarasha aıynyń ortasynda AQSh bıligi Ýkraınaǵa ATACMS ballıstıkalyq zymyrandaryn Reseı aýmaǵyna soqqy jasaýǵa ruqsat bergeni belgili boldy. 11 jeltoqsanda Reseı Qorǵanys mınıstrligi Taganrogtaǵy áskerı aerodromǵa ATACMS zymyrandarymen soqqy jasalǵanyn moıyndady.
