"Jeltoqsannyń 12-si kúni, tús aýa, saǵat 3-te dúnıege Alash avtonomııasy kelip, azan shaqyrylyp at qoıyldy. Alty alashtyń balasynyń basyna aq orda tigilip, Alash týy kóterildi. Úlken aýyldarǵa qońsy qonyp, shashylyp júrgen qyrǵyz-qazaq jurty óz aldyna aýyl boldy. Otansyz jurt Otandy boldy". Bul tarıhı sózder "Saryarqa" gazetinde jarııalanyp, Alash qozǵalysynyń mańyzdylyǵyn anyq beınelep berdi.
Alash qozǵalysy XX ǵasyrdyń basynda qazaq halqynyń táýelsizdigi men ulttyq derbestigin saqtaý úshin bastalǵan úlken ult-azattyq qozǵalys boldy. Reseı ımperııasynyń otarshyl saıasatyna qarsy turý, ulttyq mádenıetti, tildi, dindi jáne qazaq jerin qorǵaý – Alash zııalylarynyń basty maqsaty boldy. 1917 jyly shildede ótken Birinshi Jalpyqazaq sezinde Alash partııasynyń qurylýy – ult tarıhyndaǵy mańyzdy kezeńderdiń biri.
1917 jyldyń jeltoqsanynda Orynbor qalasynda ótken Ekinshi Jalpyqazaq sezinde qazaq halqynyń ulttyq múddesin qorǵaıtyn Alash avtonomııasy jarııalandy. Bul sezde avtonomııanyń shekarasy, basqarý júıesi, jáne onyń saıası-áleýmettik baǵyttary aıqyndaldy. Álıhan Bókeıhan, Ahmet Baıtursynuly, Mirjaqyp Dýlatuly syndy ult zııalylary jańa memlekettiń bolashaq basshylary retinde tanyldy.
Alash avtonomııasynyń negizin qalaýshylar demokratııalyq qaǵıdattarǵa súıene otyryp, halyqtyń teńdigi men quqyqtaryn qorǵaýdy kózdedi. «Alash» partııasynyń ulttyq ustanymy bes túrli tujyrymǵa negizdeldi:
- jer, jer jáne jer;
- barlyq ıgilik qazaq memleketine qyzmet etýi kerek;
- táýelsiz ǵylymǵa, ulttyq salt-dástúrge negizdelgen zańǵa súıene otyryp, Japonııanyń úlgisindegi ulttyq-demokratııalyq memleket qurý;
- qazaq oblystarynyń avtonomııasy;
- oqý máselesi.
Alash qozǵalysy qazaq halqynyń ulttyq sanasyn oıatý men ony táýelsizdikke jeteleý jolynda mańyzdy ról atqardy. Qozǵalys HH ǵasyrdyń 30-jyldarynda keńestik bıliktiń repressııasyna ushyraǵanymen, onyń ıdeıalary Qazaqstan táýelsizdik alǵannan keıin qaıta jańǵyrdy. Búginde Alash qozǵalysynyń tarıhı mańyzy – qazaq halqynyń azattyq jolyndaǵy kúresiniń sımvoly retinde joǵary baǵalanady.
